Йилнинг энг фаоллари тақдирланди
Миллий матбуот марказида Ўзбекистон шахмат федерациясининг 2017 йилги фаолият натижалари ва жорий йилдаги вазифаларига бағишланган матбуот анжумани бўлиб ўтди.
Таниқли шахматчилар, мураббийлар, кенг жамоатчилик вакиллари ҳамда оммавий ахборот воситалари ходимлари иштирок этган тадбирда ўтган йил ўзбек спорти, хусусан, шахмати учун ҳам омадли келгани таъкидланди.
Шахмат федерацияси биринчи вице-президенти Ҳусан Турдиалиев миллий терма жамоамиз аъзолари 2017 йил мобайнида элликка яқин халқаро турнирда қатнашиб, 39 олтин, 35 кумуш ва 36 бронза медаль жамғарганини, бу ўтган йилларда эришилган натижалардан салмоқли эканини фахр билан гапирди. Айниқса, Осиё шахмат федерацияси томонидан йил якунларига кўра, Ўзбекистон ёшлар жамоаси «Йилнинг энг яхши ёшлар делегацияси» номинациясига лойиқ кўрилгани ҳамда Россияда ўтказилган халқаро турнирда халқаро гроссмейстер талабини бажариб, жаҳон шахмат тарихида иккинчи энг ёш гроссмейстер бўлган Нодирбек Абдусатторовнинг Осиёда «Йилнинг энг яхши ўсмир шахматчиси» дея эътироф этилгани шахматсевар юртдошларимизни руҳлантирди.
— Мен учун ортда қолган 2017 йил чиндан ҳам унутилмас воқеаларга бой бўлди, — дейди Н.Абдусатторов. — Дастлаб апрелда 8—18 ёшгача ўсмирлар ўртасида кечган Осиё чемпионатида қатнашиб, умумжамоа ҳисобида 2-ўринни эгалладик, АҚШда «Мингйиллик матч»да жаҳон терма жамоаси таркибида маҳаллий шахматчиларни енгдик. Абу Дабида ўтган халқаро турнирда қатнашиб, халқаро гроссмейстерлик унвонининг 2-талабини, кейинроқ Санкт-Петербургда 3-талабини бажардим. Президентимиз Шавкат Мирзиёевнинг шу муносабат билан берилган совғаси кўнглимни тоғдек кўтарди. Мазкур эътироф ва рағбат мени келгуси мусобақаларда янада яхши натижаларга эришиб, халқаро майдонларда Ўзбекистонимизнинг интеллектуал салоҳиятини намоён этишга илҳомлантирмоқда.
Дарвоқе, тадбирда ўтган йили ўз фаоллиги ҳамда қўлга киритган ютуқлари билан ажралиб турган спортчилар ҳам тақдирланди. Хусусан, Нодирбек Абдусатторов «Йилнинг энг яхши шахматчиси», Нодира Нодиржонова аёллар ўртасида «Йилнинг энг яхши шахматчиси», Нодирбек Ёқуббоев ўғил болалар, Гулрухбегим Тоҳиржонова эса қизлар ўртасида «Йилнинг энг яхши ёш шахматчиси» дея эътироф этилди. Шунингдек, «Энг яхши ҳакам», «Энг яхши бўлим», «Энг яхши шахмат клуби», «Энг яхши мураббий» номинациялари ғолиблари ҳам рағбатлантирилди. Бир гуруҳ шахмат фидойилари, жумладан журналистлар диплом ва эсдалик нишонлари билан тақдирланди.
Матбуот анжуманида журналистлар ўзларини қизиқтирган саволларга жавоб олишди.
Зоҳиджон ХОЛОВ,
«Ma’rifat» мухбири