Қиз бола ҳунарли бўлсин!
Болалик дамларимни яхши эслайман. Раҳматли онам — Шукуржон момо қиз боланинг юриш-туриши, ўзини тутиши, ҳаттоки овқатланиши қандай бўлиши кераклигини ўз шахсий ибрати орқали кўрсатиб берар, биз қизлар ундан андоза олар эдик.
Қиз бола дастурхон атрофида қандай ўтириши керак? Меҳмон келганида мулозамат кўрсатишни биладими? Меҳмонга борганида ўзини сипо, вазмин тутадими? Онам ҳаттоки чойнак-пиёла ювишнинг ҳам ўз қоидалари борлигини кўрсатиб берарди. Таом тайёрлаганда эса бошимизга рўмол танғиб олганмиз. Энг муҳими, қиз боланинг юзидан кўра қалби гўзал бўлиши, самимийлиги, очиқ кўнгиллиги билан ён-атрофдагиларга ёқиши керак.
Худди шундай панд-насиҳатлар қулоғига сингдирилган тўрт опа-сингил аҳил-иноқ ўсдик. Турмуш қурдик, фарзанд кўрдик, оилавий ҳаёт ташвишларидан ташқари давлат идоралари ишини ҳам уддаладик. Кундалик фаолиятимизда онамнинг ўгитлари қўл келди. Уч қизимга ўзимда «бори»ни бердим. Худога шукр, уч нафар қиз неварам бор, таътилда бувисиникига қараб шошади. Бувижони тарбиялаган қизлар фаросатли, ораста ва зийрак бўлишади. Улар билан «Бувижоним ўгитлари» кўрсатувини биргаликда томоша қиламиз.
Янгибозор туманидаги 20-умумтаълим мактабида 17 йил раҳбарлик қилдим. Салкам 40 йиллик педагогик тажрибага эгаман. Кўплаб оилалар, оналар билан ўғил-қизлар тарбияси хусусида суҳбатлашиш, баҳс-мунозара қилишга тўғри келган. Кўпчилик оналар қизимни узатсам бўлди, дея калтароқ фикрлашади. Унга мол-дунё, латта-путта йиғади. Лекин унинг қўлида дипломи, ҳунари бўлса, бу моддиятдан устун туради. Касби, ҳунари бўлган қиз фаровон яшайди, бировга муте бўлмайди. «Остонаси тилло» уйга тушган келинчак хушмуомаласи, эпчиллиги, пазандалиги билан ҳурматга эришади. Тушган хонадоннинг паст-баланди, яхши-ёмонига сабр-қаноат қилган қизларни бахту саодат манзили кутади. Муаллиф таъкидлаганидек, оилавий ҳаётга ҳар томонлама тайёрланган қизнинг турмуши мустаҳкам ва барқарор бўлади.
Дилбар ОРТИҚОВА, Халқ таълими аълочиси, фахрий педагог