Ўқувчилар яратаётган мўъжиза
— Устоз, қаранг, мен ясаган ҳайкалча негадир синиб тушаяпти?
Ўқувчисининг саволидан кейин тўгарак раҳбари Умид Аҳмаджонов у ясаган ҳайкалчани қўлига олиб синчиклаб кузатди.
— Лойини яхши пишитмасанг, қанчалик чиройли буюм ясасанг ҳам барибир синиб тушаверади. Мана, хатонг нимада. Агар билсанг, кулолчилик — сабр-тоқат талаб қиладиган ҳунар.
Сергели туманидаги 322-мактабда 1032 нафар ўқувчининг дарсдан бўш вақти 36 йўналишдаги тўгаракда ана шундай қизғин ўтади. Хусусан, фан тўгараклари, ҳайкалтарошлик, тасвирий санъат, тўқиш, тикиш-бичиш, мусиқа ҳамда спорт йўналишидаги машғулотларда ўқувчилар устозларидан ўз қизиқишига қараб ҳунар ва касблар бўйича илк кўникмаларга эга бўлади.
Сокин аммо дилтортар мусиқа таралаётган хона томон одимладик. Мусиқа ўқитувчиси Райҳон Умарқулова ўқувчиларга миллий чолғу асбоби ёрдамида куй чалишни ўргатаётган экан.
Мольберт қаршисида худди моҳир рассомлардек мўйқаламини юргизаётган қизалоқ тасаввурида нималарнидир жонлантирмоқда. Тасвирий санъат тўгараги аъзолари ҳам ўз ижод намуналари билан турли кўргазма ва танловларда қатнашса, тўқиш машғулотларида қизалоқлар шапка, шарф ва жажжи қўлқопчалар тўқиб ўз яқинларини хурсанд қилади.
— Мактабимизда фан ва қизиқишга кўра ташкил қилинган касб-ҳунар тўгараклари қатори 6 турдаги спорт тўгараклари ҳам фаолият юритади, — дейди мактаб раҳбари Барно Турғунова. — Фарзандлари дарсдан кейин вақтини мазмунли ўтказаётганидан ота-оналарнинг кўнгли тўқ. Ўғил-қизларнинг бирор касб ёки ҳунарни шунчаки мажбурият юзасидан эмас, балки мўъжиза яратаётгандек завқу шавқ билан ўрганаётганини кўриб биз устозлар ҳам қувонамиз.
Бурҳон РИЗОҚУЛОВ