Вазир ўринбосари мактабда ўқувчиларга дарс ўтди

Халқ таълими вазири ўринбосари Отабек Назиров 4-5 декабрь кунлари Қашқадарё вилоятининг Чироқчи туманидаги умумтаълим мактабларида бўлиб, тумандаги 2-мактабнинг 5-синф ўқувчиларига инглиз тилида дарс ўтди. Бу ҳақда turon24.uz хабар бермоқда.

— Ўқувчилар учун вазир ўринбосарининг дарс ўтгани эсда қоларли воқеа бўлди, – дейди 2-мактаб директори Баҳодир Эштемиров. – Вазир ўринбосари ўқувчиларга халқ таълими вазирлиги номидан проектор ва ноутбук совға қилди.

Вилоят халқ таълими бошқармаси мутасаддисининг маълум қилишича, вазир ўринбосари ташриф давомида тумандаги 4 та мактаб ўқувчиларига вазирлик ҳомийлиги билан ташкил этилган проектор ва ноутбукларни топширган.

— Отабек Анварович вилоятимизга ташрифи давомида тумандаги 3-, 24- ва 140-мактабларда ҳам бўлиб, ўқувчиларга яратилган шароитлар билан танишди, — деди  вилоят халқ таълими бошқармаси бошлиғи ўринбосари  Мақсуд Панжиев.

—    Вазир ўринбосари мактабимизда баскетбол спорт турини ривожлантириш таклифини ўртага ташлади. У  мактаб ўқувчилари учун спорт анжомлари ва футбол тўпларини ҳам совға қилди , – дейди  Баҳодир Эштемиров. – Вилоятдаги масъул ходимларга мактабда баскетболни ривожлантириш учун шарт-шароит ҳозирлаш хусусида кўрсатма берди.

Вазир ўринбосари, шунингдек, ўқувчилар давомати ва мактаб формасига алоҳида тўхталиб, таълим муассасаларининг иситиш тизимини ҳам кўздан кечирган.