Назарий ва амалий билимлар имтиҳони
Зангиота туманидаги 56-мактабда «Энг яхши кимё, биология ва физика фан кабинети мудири» кўрик-танловининг Тошкент вилояти босқичи бўлиб ўтди. Танловнинг биринчи — туман босқичида 700 нафарга яқин фан ўқитувчилари қатнашган бўлса, кейинги босқичда 54 иштирокчи ғолиблик учун баҳсга киришди. Беллашувга мезбонлик қилаётган таълим муассасасида қатнашчилар учун барча зарур шарт-шароитлар муҳайё қилинди.
— Фаолиятимизда мазкур танловнинг ўрни катта, — дейди Чирчиқ шаҳридаги 8-мактабнинг биология фани ўқитувчиси Дилором Жўраева. — Беллашув бизни изланишга, таълим сифат-самарадорлигини оширишда фаоллик кўрсатишга ундайди. Ҳамкасблар билан учрашиб, фикр ва тажриба алмашиш имконининг мавжудлиги, намунали метод ҳамда усулларнинг оммалашишига қулай муҳит шакллантирилгани танлов нуфузини янада оширади. Жараёнда ўқитувчиларнинг назарий билимлари билан бирга амалий кўникмалари ҳам синовдан ўтказилди.
Қатнашчиларнинг ишини малакали мутахассислардан иборат ҳакамлар ҳайъати холис ва адолатли баҳолаб борди.
— Кўрик-танловнинг Тошкент вилояти босқичига ҳар бир педагог пухта тайёргарлик билан келган. Буни уларнинг фаоллигидан кўриш мумкин, — дейди ҳакамлар ҳайъати аъзоси, Зангиота туманидаги 1-мактабнинг биология фани ўқитувчиси Дилдора Обидова. — Танловда ўқитувчиларнинг фанни чуқур ўзлаштиргани, педагогик-психологик салоҳиятини, назарий билимларини амалиётда қўллай олиш даражасини кузатдик. Уларнинг фаолиятига доир ҳужжатларни ўз ичига олган йиғмажилд, ўқувчиларининг билимлар беллашуви, фан олимпиадаларида кўрсатган натижаларига ҳам эътибор қаратдик. Ҳар бир иштирокчи ўз мактабида ўқувчилари билан бирга ўтказган лаборатория ишининг видеоролигини ҳам тақдим этди.
Якуний натижаларга кўра, 1-, 2-, 3-ўрин эгалари аниқланиб, диплом ва эсдалик совғалари билан тақдирланди.
Дилмурод ДЎСТБЕКОВ,
«Ma’rifat» мухбири