ENG YAXSHI SOVG‘A

Insonning ma’rifatli, ma’naviyatli, madaniyatli bo‘lishida kitobning roli benihoya katta. Bunday insonlardan   hyech qachon yomonlik chiqmaydi. Ziyoli odam o‘zining bilimini, tajribasini, amaliy ko‘nikmalarini boshqalarga ham o‘rgatishga harakat qilib, o‘sha o‘rgangan insonning o‘zidan biron narsani   o‘zlashtirganini ko‘rgan paytda uning quvonchi ichiga sig‘may ketadi. Mana shu shodlik, quvonch hislari faqat adabiyotdan, badiiy asarlardan bahramand bo‘lgan   odamlar qalbida jo bo‘ladi...  

Prezidentimiz   Shavkat Mirziyoev kitob va kitobxonlik, ma’naviyat xususida qayta va qayta ta’kidlayaptilar. Bu esa yurtdoshlarimiz qalbiga g‘urur bag‘ishlab, odamlarni kitobga bo‘lgan ishtiyoqini oshirayapti.

Qaysi oilada kitobxonlikka e’tibor qaratilgan bo‘lsa, o‘sha xonadonda kamol topayotgan farzandlar   SO‘Zni, ilmni   qadrlaydilar.   Komil inson bo‘lishga intiladilar.

Bu yilgi yangi o‘quv yilining ilk kuni   Qashqadaryo viloyati Kasbi tumanidagi   14 –umumta’lim maktabining 34 nafar 7 – “F” sinf o‘quvchilari   uchun bir umr   esda qoladigan bo‘ldi. Sinf rahbari Adiba Ayizova   padari buzrukvori – O‘zbekiston Yozuvchilar uyushmasi va jurnalistlar uyushmasi a’zosi Abdulla Ayizovning   “Yangi kitob” nashriyotida chop etilgan bolalarga bag‘ishlangan “O‘zimizning Beg‘amboy” qissasi hamda she’rlar, hikoyalardan iborat “Turfa odamlar” nomli to‘plamini hamda   “O‘zbekiston” nashriyot – matbaa ijodiy uyi tomonidan qayta nashr qilingan “Polvon yig‘lagan tun”   qissalar kitobini   o‘quvchilarga sovg‘a qildi. Shunday qilib, o‘quvchilar yangi o‘quv yilini yangi kitoblar bilan   qarshiladilar.

  - O‘tgan yili ham shu sinfga rahbarlik qilgan edim. O‘quv yili yakunida eng a’lochi va namunali xulqqa ega bo‘lgan   sanoqli o‘quvchilarga qiziqarli kitoblar sovg‘a qilib, ularni rag‘batlantirdim. Otam bu haqda eshitib, bir g‘oya aytdilar. “Yil davomida kim a’lochi bo‘larkin deb vaqtni o‘tkazgandan ko‘ra,   o‘quv yili boshida barcha o‘quvchilarni kitob bilan kutib olsang yaxshi bo‘lardi. Shunda ijobiy natijani ko‘rasan, hamma o‘quvchi a’lochi bo‘ladi...” dedilar va Toshkentdan o‘zlarining   yangi nashr etilgan kitoblaridan   yubordilar. Kitoblarni maktabimizning   o‘quv ishlari bo‘yicha   direktor o‘rinbosari Xolmo‘min Zoyirov   hamda tajribali o‘qituvchi Xurshida Ataullaeva bilan birgalikda o‘quvchilarga ulashdik.

Eng yaxshi sovg‘a – kitob olgan o‘g‘il – qizlar    quvonchi har birining yuz – ko‘zlarida aks etdi. Zero, kitob bilan do‘st tutingan qalblarda hamisha ezgu maqsadlar mujassam bo‘ladi.

Sevin OCHILOV,

Qashqadaryo viloyati Maktabgacha va

maktab ta’limi   boshqarmasi metodisti.