Ёш тадбиркор — юртга мададкор
Тошкент вилояти Бўстонлиқ туманидаги «Камолот» ёшлар оромгоҳида «Ёш тадбиркор — юртга мададкор» лойиҳасининг республика босқичи ўтказилди. «Камолот» ёшлар ижтимоий ҳаракати томонидан Ўзбекистон савдо-саноат палатаси, Республика Марказий банки ҳамда қатор тижорат банклари билан ҳамкорликда ташкил этилган ушбу лойиҳада тадбиркорлик фаолиятини юритиш ва кенгайтириш истагидаги 18дан 30 ёшгача бўлган 140 нафар йигит-қиз иштирок этди.
2008 йилдан буён анъанавий тарзда ўтказиб келинаётган ушбу лойиҳанинг асосий мақсади ёшларни ижтимоий ҳимоя қилиш, замонавий касб-ҳунарларни эгаллашга бўлган интилишларини қўллаб-қувватлаш, янги иш ўринлари ташкил этиш ва аҳолини иш билан таъминлаш, тадбиркорлик фаолиятига кенг жалб этиш, тадбиркорлик кўникмаларини шакллантиришдан иборат.
Тадбирда Тошкент шаҳридаги Сингапур менежментни ривожлантириш институти, солиқ ҳамда банк-молия академияларининг малакали бизнес-тренерлари, маркетологлар, экспертлар ва тижорат банклари мутахассислари томонидан «Корхона маркетинг сиёсатини аниқлаш», «Маркетинг-микс (маҳсулот, жой, нарх ва ўтказиш)», «Бизнес режа ёзиш талаблари», «Тадбиркор психологияси», «Кичик бизнесни юритишда солиқ ставкалари», «Кичик бизнесда бухгалтерия», «Кичик бизнесда бухгалтерия ҳисобини юритишнинг ўзига хослиги», «Ягона дарча» марказининг вазифа ва имкониятлари», «Кичик бизнесни солиққа тортиш ва солиқ имтиёзлари» каби мавзуларда ўтказилган семинар-тренинг ёш тадбиркорлар учун фойдали бўлди. Беш кун давомида «Кичик бизнес ва хусусий тадбиркорлик — ёшларга оид давлат сиёсатининг муҳим йўналиши сифатида», «Ёшларда тадбиркорлик кўникмаларини шакллантириш ва ёшлар тадбиркорлигини ривожлантириш борасида амалга оширилаётган ишлар», «Ўзбекистон Республикасида кичик бизнес ва хусусий тадбиркорлик соҳасини тартибга солишнинг қонуний-меъёрий асослари», «Кичик бизнес ва хусусий тадбиркорликда маркетинг тизими», «Кичик бизнесни имтиёзли кредитлаш тизими, кредит фоизи, муддати, гаров таъминоти», «Тадбиркорлик соҳасида техника-технологиялар топиш, хомашё олиб келиш ва экспорт-импорт операцияларини ривожлантириш» мавзуларидаги қизиқарли тақдимотлар намойиши йигит-қизларнинг бу борадаги билимини кенгайтирди. Лойиҳа доирасида ташкил этилган «Made in Uzbekistan» шиори остидаги миллий маҳсулотлар кўргазмасида мамлакатимизда фаолият юритаётган ёш тадбиркорлар томонидан ишлаб чиқарилаётган маҳсулотлар намойиш этилди.
Лойиҳа якунида бизнес режаларини муносиб ҳимоя қилиб, ғолибликни қўлга киритган 50 нафар ёш тадбиркор имтиёзли кредит олиш имкониятига эга бўлди ва уларнинг кредит фоизлари «Камолот» ЁИҲ томонидан қопланади. «Энг кўп иш ўрни яратишга қаратилган лойиҳа», «Энг яхши инновацион ғоя», «Энг чекка қишлоқ жойда маиший хизмат ва сервисни ривожлантиришга ҳисса қўшган тадбиркор», «Ижтимоий тадбиркорликка йўналтирилган лойиҳа», «Хотин-қизлар тадбиркорлигини ривожлантиришга қаратилган лойиҳа» каби номинациялар бўйича ғолиблар аниқланди. Бундан ташқари, ғолибликни қўлга киритган 17 нафар истиқболли бизнес режа эгасига “Камолот”дан кафолат” гаров таъминотига оид суғурта полисини олиш имконини берувчи сертификат ва эсдалик совғалари топширилди.
Дилшод РЎЗИҚУЛОВ,
«Ma’rifat» мухбири