Kомпенсация тўланади
Хонадонларга бориб, якка тартибда таълим бераётган ўқитувчиларга йўл ҳақи учун компенсация тўланадими?
Н.БОТИРОВА, Андижон шаҳри
— Ўзбекистон Республикаси Бандлик ва меҳнат муносабатлари, Халқ таълими ва Молия вазирликларининг 2013 йил 28 январдаги “Уйда ижтимоий ёрдам хизмати ходимлари ҳамда ногирон болаларни уйида ўқитганлик учун умумтаълим мактабларининг ўқитувчиларига йўл ҳақи компенсацияси тайинлаш ва тўлаш тартиби тўғрисидаги низомни тасдиқлаш ҳақида”ги 5-ҚҚ, 3-, 10-сонли қарори (2013 йил 5 мартда Адлия вазирлигида 2435-сон билан рўйхатдан ўтказилган)га мувофиқ қуйидагилар белгиланган:
Мактаб ўқитувчиларига компенсацияни тайинлаш — мактабдан ўқитилаётган ўқувчининг яшаш жойигача камида 1,5 километр масофа бўлганда уйда ўқитилаётган бир нафар ўқувчи учун энг кам ойлик иш ҳақининг 100 фоизи миқдорида амалга оширилади.
Бир нафар уйда ўқитилаётган ўқувчига бириктирилган бир нечта ўқитувчиларга компенсация уларнинг ҳар ойда амалда ўтказадиган ўқув соатлари улушидан келиб чиққан ҳолда уйда ўқитилаётганларнинг ўқув режасидаги ўқув соатларининг умумий миқдорига мутаносиб равишда белгиланади.
Бунда ҳар бир мактаб ўқитувчиси учун компенсациянинг умумий миқдори энг кам ойлик иш ҳақининг 100 фоизидан ошмаслиги лозим.
Саволга Халқ таълими вазирлигининг молиялаштириш, бухгалтерия ҳисоби ва ҳисоботи бошқармаси бош иқтисодчиси Илҳом СИРОЖЕВ жавоб берди.