Oq yo‘l sizga, aziz bitiruvchi!

Bugunning yoshlari Oq yo‘l sizga, aziz bitiruvchi!

18:30 / 27.06.2026 273

Bugun dunyoda yetakchilik omili tabiiy boyliklar yoki hudud bilan emas, ilm-fan, tafakkur va salohiyatli inson kapitali bilan belgilanmoqda. Shu bois, har bir davlat kelajagini bilimli, ma’naviyatli va Vatanga sadoqatli yoshlar timsolida ko‘radi. Yurtimizda ham yoshlarning sifatli ta’lim olishi, o‘z iqtidorini namoyon etishi hamda jamiyatda munosib o‘rin egallashi uchun keng imkoniyatlar yaratilmoqda. Mana shunday yuksak e’tibor natijasida bugun minglab yoshlar kelajagiga ishonch bilan kasb pillapoyalarida dadil odimlamoqda.

O‘zbekiston xalqaro islomshunoslik akademiyasida “Oq yo‘l sizga, aziz bitiruvchi!” kechasi tashkillashtirildi. Unda bitiruvchi talabalar, ularning ota-onalari, professor-o‘qituvchilar hamda faxriy mehmonlar ishtirok etdi. Akademiya rektori Muzaffar Komilov bitiruvchilarni samimiy tabriklab, ularning kelgusidagi faoliyatida ilm, halollik va yuksak ma’naviyat asosiy mezon bo‘lishi zarurligini ta’kidladi.

Jarayonda ta’limdagi yutuqlari, ilmiy izlanishlari hamda jamoat ishlaridagi faolligi bilan ajralib turgan bir guruh talabalar munosib rag‘batlantirildi. Xususan, Akademiya tarixida ilk bor “Akademiya faxri” ko‘krak nishoni, guvohnomasi va maxsus diplomini topshirish tizimi yo‘lga qo‘yildi. Mazkur e’tirofga o‘qishni a’lo baholar bilan tamomlagan, ta’lim muassasasining ilmiy va ma’naviy hayotida faol ishtirok etgan hamda uning nufuzini oshirishga hissa qo‘shgan 42 nafar bitiruvchi sazovor bo‘ldi.

Shuningdek, bitiruvchilar va ularning ota-onalari so‘zga chiqib, farzandlarining har tomonlama kamol topishida munosib hissa qo‘shgan ustozlarga hamda Akademiya rahbariyatiga minnatdorlik bildirdi.

Tadbir teatrlashtirilgan sahna ko‘rinishlari, kuy-qo‘shiqlar, she’riy chiqishlar va san’atkorlarning konsert dasturlari bilan yanada ko‘tarinki ruhda davom etdi.

Ma’lumot o‘rnida, bugun Akademiyada Islom iqtisodiyoti va xalqaro munosabatlar hamda Islomshunoslik va Mumtoz sharq filologiyasi fakultetlari, shuningdek, 10 ta kafedra faoliyat yuritmoqda. Joriy o‘quv yilida 591 nafar bakalavr va 125 nafar magistratura bosqichi bitiruvchisi oliy ta’limni muvaffaqiyatli yakunladi.