Xudoyqulova dars berishga haqli emas
![Xudoyqulova dars berishga haqli emas](http://marifat.uz/images/articles/3249/primary-large.jpg)
Gazetamizning 2019-yil 15-may sonida “Samarqandda sudyalar kimga xizmat qilyapti?” sarlavhali maqola chop etilgan edi. Xalq ta’limi vazirligi ushbu maqola yuzasidan munosabat bildirdi.
O‘zbekiston Respublikasi Xalq ta’limi vazirligi “Ma’rifat” gazetasining joriy yil 15-may sonida chop etilgan “Samarqandda sudyalar kimga xizmat qilyapti?” sarlavhali tanqidiy maqola yuzasidan quyidagilarni ma’lum qiladi.
Aniqlanishicha, Nasiba Xudoyqulova 2009-yilda Paxtachi pedagogika kollejini “Boshlang‘ich sinflarda jismoniy tarbiya tashkilotchisi” va “Maktabgacha ta’lim muassasalarida jismoniy tarbiya tashkilotchisi” mutaxassisligi bo‘yicha tamomlagan. Mazkur diplomda qayd etilgan mutaxassislikka ega shaxslarni umumta’lim maktabiga o‘qituvchi lavozimiga ishga qabul qilish mumkin emas.
Vazirlar Mahkamasining 2017-yil 4-oktabrdagi 164-sonli qarori asosida Xalq ta’limi vazirligining 2018-yil 14-iyundagi 160-sonli buyrug‘i bilan tasdiqlangan “Xalq ta’limi xodimlari lavozimlarining asosiy malaka tavsiflari”da:
a) boshlang‘ich sinf o‘qituvchilari uchun boshlang‘ich ta’lim ixtisosligi bo‘yicha kamida o‘rta maxsus pedagogik ma’lumot;
b) fan o‘qituvchisi uchun fan yo‘nalishiga to‘g‘ri keluvchi kamida bakalavr darajasidagi oliy pedagogik ma’lumot yoki kamida bakalavr darajasidagi oliy ma’lumot va fan yo‘nalishiga to‘g‘ri keluvchi kursni tugatganlik;
d) xorijiy tillardan birining boshlang‘ich bosqichini va axborot-kommunikatsiya texnologiyalaridan foydalanishni bilish talab etiladi.
Haqiqatan ham, maqolada ta’kidlanganidek, mutaxassisligi to‘g‘ri kelmasa-da, N.Xudoyqulova turli tashkilotlarga beto‘xtov arizabozliklardan keyin yuqori tashkilotlarning ko‘rsatmasi asosida Samarqand shahridagi 48-umumta’lim maktabiga 2018-yil 12-yanvardan uyda yakka tartibda ta’lim beruvchi o‘qituvchi vazifasiga ishga qabul qilinib, 4-sinfda o‘qiydigan nogiron qiziga uyda ta’lim berish bilan shug‘ullangan.
Xalq ta’limi vazirligi va Sog‘liqni saqlash vazirligining 2015-yil 10-iyundagi 15-mh-sonli qaroriga asosan “Jismoniy yoki psixik rivojlanishida nuqsoni bo‘lgan hamda uzoq vaqt davolanishga muhtoj bolalarning uyda yakka tartibda ta’lim olishlarini tashkil etish tartibi to‘g‘risida” ishlab chiqilgan nizomga ko‘ra:
Uyda yakka tartibda ta’lim berishning asosiy maqsadi — o‘quvchilarning ta’lim olishga bo‘lgan huquqlarini ta’minlash hamda ularning ta’lim olishlari uchun zarur sharoit yaratish;
o‘quvchini jonkuyar, mas’uliyatli va kamida 5 yil pedagogik tajribaga ega bo‘lgan mutaxassis o‘qituvchi bilan ta’minlash vazifalari belgilab qo‘yilgan.
Uzoq vaqt davolanishga muhtoj o‘quvchilarning uyda yakka tartibda ta’lim olishi uchun tasdiqlangan o‘quv rejasida 5-sinf o‘quvchisiga jami 10 soat, ya’ni rus tilidan 1 soat, ona tili va adabiyotdan 4 soat, xorijiy tildan 0,5 soat, tarixdan 1 soat, matematikadan 2 soat, biologiyadan 0,5 soat, tabiat va geografiyadan 0,5 soat, tasviriy san’atdan 0,5 soat dars o‘tilishi belgilangan.
Ushbu me’yoriy hujjatlarga ko‘ra, yuqori sinf o‘quvchilariga har bir fandan alohida oliy ma’lumotli mutaxassis o‘qituvchi dars berishi kerak.
Samarqand shahar xalq ta’limi bo‘limi tomonidan N.Xudoyqulovaga nogiron farzandi borligi inobatga olinib, yashash manzili yonidagi Spitamen shohko‘chasidagi 68-umumta’lim maktabi boshlang‘ich sinflarida jami 10 soat texnologiya (mehnat) va jismoniy tarbiya fani o‘qituvchisi vazifasiga ishga joylashish taklifi berilgan. Fuqaro N.Xudoyqulova tomonidan bu taklif rad etilgan.
Samarqand shahridagi 48-umumta’lim maktabi direktori tomonidan boshlang‘ich kasaba uyushma qo‘mitasi bilan kelishgan holda 2018-yil 28-avgustda N.Xudoyqulovaga ma’lumoti va mutaxassisligi malaka talabiga mos kelmasligi sababli u bilan tuzilgan mehnat shartnomasi bekor qilinishi haqida ogohlantirish xati yuborilgan va 2018-yil 28-avgustdagi 110-sonli buyruq bilan 2 oy muddatga kompensatsiya puli to‘langan.
Ikki oy muddat yakunlangandan keyin 2018-yil 29-oktabrda N.Xudoyqulovaga maktab direktori tomonidan 183-sonli mehnat shartnomasi bekor qilinishi to‘g‘risida buyruq nusxasi yuborilgan. N.Xudoyqulova 2018-yil 24-noyabr kuni 5-oktabrdan 23-noyabrgacha bo‘lgan muddatga mehnatga layoqatsizlik varaqasini taqdim etgan. Shu sababli maktabning 29-oktabrdagi 183-sonli buyrug‘i bekor qilinib, kompensatsiya davri 2018-yil 24-noyabrdan boshlab 23 kunga uzaytirilgan va 2018-yil 17-dekabrda N.Xudoyqulovaga mehnat shartnomasi bekor qilinishi to‘g‘risida 210-sonli buyruq yuborilgan.
2019-yil 11-fevral kuni Fuqarolik ishlari bo‘yicha Samarqand viloyat sudi tomonidan N.Xudoyqulovani uyda yakka tartibda ta’lim beruvchi o‘qituvchi vazifasiga tiklash bo‘yicha qaror qabul qilingan. Qaror ijrosini ta’minlash maqsadida 48-umumta’lim maktabi direktori Sh.Hasanova tomonidan uyda yakka tartibda o‘qitish uchun oliy pedagogik ma’lumotga ega bo‘lmasa-da, N.Xudoyqulovaga 1 soat dars ajratilgan. Qolgan 9 soat dars boshqa mutaxassis o‘qituvchilarga taqsimlab berilgan.
Maqolada Fuqarolik ishlari bo‘yicha Samarqand viloyat sudi o‘z himoyasiga olgan N.Xudoyqulovaning kimligi va faoliyati haqida batafsil ma’lumot berilgan. Xalq ta’limi vazirligi maqolada jurnalist tomonidan keltirilgan fikrlarga to‘liq qo‘shilgan holda O‘zbekiston Respublikasi Oliy sudidan amaldagi qonunchilikka asosan odilona hukm chiqarib, adolat qaror topishini kutib qoladi.
Zero, yosh avlod kelajagi o‘z bilimi, tajribasi, pedagogik mahorati va yuksak insoniy fazilatlari bilan shaxsiy namuna bo‘la oladigan fidoyi ustozlar qo‘lidadir.
Xalq ta’limi vazirligi tomonidan Samarqand viloyat xalq ta’limi boshqarmasi, Samarqand shahar xalq ta’limi bo‘limi rahbar va mas’ul xodimlari tegishli masalalar yuzasidan ogohlantirilib, ularga me’yoriy hujjatlarni amaldagi qonun va qonunosti hujjatlariga muvofiq ravishda yuritish, umumta’lim maktablarida sog‘lom ishchi muhitini yaratish bo‘yicha tegishli ko‘rsatmalar berildi.
Alisher UMAROV, Xalq ta’limi vazirining birinchi o‘rinbosari