Спорт ҳафталиги ўтказилди
Саломатлик — энг катта бойлик. Уни асраш ва мустаҳкамлаш учун спортга ошно тутиниш жоиз. Шу мақсадда Қорақалпоғистон Республикасида ўтказилган спорт ҳафталигида ёшу қари фаол қатнашди.
— Инсон ёши кексайгани сари саломатлигига турли хасталиклар хавф солади, — деди нуроний Байназар Эрназаров. — Бу хасталикларни ҳаракат билан енгиш мумкин. Шу боис, мен ёшлигимдан ҳар куни тонгда югуриш, бадантарбия машқларини бажаришни одат қилганман. Кўз тегмасин саломатлигим яхши, анча тетикман. Ёшларга ҳам ҳамиша соғлом турмуш тарзига амал қилишни тавсия этаман.
Спорт ҳафталигида Қорақалпоғистон Республикаси бўйича 18 мингдан ортиқ ёшлар турли спорт мусобақаларида ўз куч ва иқтидорини синовдан ўтказди. Уларнинг 5 минг нафардан ортиғини қизлар ташкил этди. 718 мингдан ортиқ турли ёшдаги фуқаролар эса оммавий турда жисмоний тарбия машқларини бажаришда қатнашди. Нукус шаҳрида ўтказилган биргина веломарафон мусобақасида икки мингга яқин ёшлар иштирок этди.
— Велоспорт билан уч йилдан буён шуғулланаман, — деди мусобақанинг энг ёш иштирокчиларидан бири Бегис Каримбаев. — Кўплаб мусобақаларда қатнашиб, яхши натижаларга эришдим. 2017 йили ушбу спорт тури бўйича Қорақалпоғистон Республикаси очиқ чемпионатида биринчи ўринни қўлга киритдим. Бу спорт инсоннинг чаққон бўлиши, мия фаолиятининг яхши ривожланишида катта роль ўйнайди.
Спорт ҳафталигининг ёпилиш маросими концерт дастури билан якунланди. Мусобақанинг фаол иштирокчи ва ғолиблари диплом ҳамда эсдалик совғалари билан тақдирланди.
Несибели МАМБЕТИРЗАЕВА,
“Ma’rifat” мухбири