2024-yil kashfiyotlari: hayotni osonlashtiradi

Insoniyat necha ming yillardan buyon o‘z hayotini yanada osonlashtiradigan kichik ixtirolardan tortib, koinotni ham zabt etish uchun kosmik kashfiyotlar ustida bosh qotirmoqda. 2024-yil ham ana shunday innovatsion yangiliklarga boy bo‘ldi.

Simsiz va shaffof televizor namoyish etildi

LG kompaniyasi elektronika sohasida istiqbolli texnologiyalar uchun tengsiz sinov maydoni bo‘lgan CES−2024 xalqaro ko‘rgazmasida dunyodagi birinchi simsiz va shaffof televizorni namoyish etdi. LG Signature OLED T modeli ko‘rgazmada “Innovatsiyalarning eng yaxshisi” nominatsiyasiga loyiq topildi.

Ushbu noyob mahsulot zamonaviy dizayn va shaffof 4K OLED ekrani­ga ega. Audio va videoni simsiz uzatish Zero Connect Box orqali amalga oshiriladi. Shu bois foydalanuvchilar ushbu televizorni xohlagan joyga simsiz o‘rnatishi mumkin. 

LG Singature OLED T ikkita ekran rejimini taqdim etadi: shaffof va qora. 77 dyuymli shaffof displey o‘chirilganida deyarli ko‘rinmaydi. Yuqori tasvir sifatini ta’minlaydigan qora rejimga o‘tish uchun masofadan boshqarish pultidagi tugmani bosish kifoya.

Yangilangan protsessor va Alpha 11 AI, shuningdek, LGning WebOS Smart TV operatsion tizimi bilan jihozlangan LG Signature OLED T televizori avvalgi modellarga qaraganda to‘rt baravar yuqori unumdorlikka ega.