KORRUPSIYA - TARAQQIYOTGA TAHDID

O‘zbekiston Respublikasining 2017-yil 3-yanvar kunida qabul qilingan “Korrupsiyaga qarshi kurash to‘g‘risida”gi qonuni hamda O‘zbekiston Respublikasi Prezidentining 2021-yil 6-iyuldagi “Korrupsiyaga qarshi murosasiz munosabatda bo‘lish muhitini yaratish, davlat va jamiyat boshqaruvida korrupsiyaviy omillarni keskin kamaytirish va bunda jamoatchilik ishtirokini kengaytirish chora-tadbirlari to‘g‘risida”gi 

PF-6257-son farmonigf muvofiq, yangi O‘zbekistonda korrupsiyaga qarshi kurashish sohasida muhim tashkiliy-huquqiy islohotlar amalga oshirilmoqda. Aholining huquqiy ongi va huquqiy madaniyatini oshirishga, jamiyatda korrupsiyaga murosasiz munosabatni shakllantirishga yo‘naltirilgan tizimli choralar ko‘rilmoqda.

Xususan, favqulodda vaziyatlar vazirligi tizimida ham korrupsiya ko‘rinishlarining sabab va shart-sharoitlarini bartaraf etish, korrupsiyaga qarshi murosasiz kurashish hamda korrupsiyani oldini olishga alohida e’tibor qaratilgan. 

Jumladan, Favqulodda vaziyatlar vazirligi akademiyasida bugun “Korrupsiya-taraqqiyotga tahdid” mavzusida davra suhbati o‘tkazildi.

Tadbirda O‘zbekiston Respublikasi Harbiy prokuraturasi, harbiy prokuratura organlari tergov tarmoqlari faoliyati ustidan nazorat bo‘limi boshlig‘i, adliya polkovnigi O‘zbekiston Respublikasi Harbiy prokurorining katta yordamchisi, adliya polkovnigi Shuhrat Sanayev, Huquqni muhofaza qilish akademiyasi, Korrupsiyaga qarshi kurashish ilmiy-ta’lim markazi katta prokurori Timur Safarov, Korrupsiyaga qarshi kurashish agentligi xodimi Jo‘rabek Beshimov, Akademiya professor-o‘qituvchilari, harbiy xizmatchilar, kursantlar hamda OAV xodimlari ishtirok etdi. 

Ushbu davra suhbatini o‘tkazishdan maqsad – barcha ta’lim tashkilotlari, yoshlarda korrupsiyaga qarshi kurashish faol dunyoqarash va mustahkam fuqarolik nuqtai nazarini shakllantiradigan chora-tadbirlarni amalga oshirish, korrupsiyaga qarshi kurashish mavzusida ijtimoiy tadbirlarga yoshlarni keng jalb qilish, yoshlar o‘rtasida korrupsiyaga qarshi kurashish mavzusida respublika miqyosida tanlovlar va musobaqalar o‘tkazishga qaratilgan masalalarni  muhokama qilishdan iborat.

Tadbirni Akademiya boshlig‘i polkovnik Muzaffar Mamasiddiqov ochib, joriy yilning 5-mart kuni davlatimiz rahbari tomonidan korrupsiyaga qarshi kurashish milliy kengashida o‘tkazilgan yig‘ilishda belgilab berilgan vazifalar ijroga qaratiganligini alohida ta’kidlab, korrupsiya islohotlar yo‘lidagi eng katta to‘siq va g‘ov ekanini,  shu bois so‘nggi yillarda bu illatga qarshi kurashish bo‘yicha yangi tizim yaratilganini, eng muhimi, jamiyatda korrupsiya muammosini jamoatchilik muhokamasiga olib chiqadigan ochiq tizim, ochiq muhit yaratilganligini, ayniqsa, ommaviy axborot vositalarining bu boradagi o‘rni va ta’siri ortib borayotganligini alohida e’tirof etdi.

Shundan so‘ng, tadbirda so‘zga chiqqanlar bugungi kunda korrupsiya fuqarolarning ijtimoiy adolatga, davlat organlariga nisbatan ishonchini susaytirishini, davlatning iqtisodiy o‘sishiga salbiy ta’sir ko‘rsatishini, qolaversa jamiyatdagi ma’naviy muhitni buzilishiga olib kelishi xususida to‘xtalib o‘tdilar. Shuningdek, korrupsiya – bu mansabdor shaxslar tomonidan davlat hokimiyati yoki boshqaruvi vakolatlaridan foydalangan holda shaxsiy manfaatlarni yoki boshqa shaxslar manfaatini ko‘zlab sodir etiladigan jinoyatlar yig‘indisi ekanligi, ayni damda korrupsiyaga qarshi kurashish davlat va barcha jamoatchilik tashkilotlari hamda moliyaviy muassasalarda ustuvor vazifaga aylanganligini alohida ta’kidladilar. 

Muxtasar qilib aytganda, davlat va jamiyat rivoji, barqaror taraqqiyotiga jiddiy to‘siq bo‘lib, sohalar yuksalishiga bevosita tahdid tug‘diradigan asosiy illat – bu korrupsiyadir. Shunday ekan, korrupsiyaga nisbatan murosasiz munosabatni qaror toptirish bugun har qachongidan-da dolzarb ahamiyat kasb etmoqda. Buning uchun esa har bir fuqaro o‘zida mas’uliyatni his etishi lozim.

Farhodjon XOJAYEV,

FVV Akademiyasi

katta o‘qituvchisi