Ochiq eshiklar kuni
FVV Akademiyasida “Yoshlar kuni” doirasida "Akademiyada bir kunim" shiori ostida "Ochiq eshiklar kuni" hamda "Rahbar va yoshlar" uchrashuvi tadbirlari o‘tkazildi
Muhtaram Prezidentimizning kuni kecha Ko‘ksaroy qarorgohida yoshlar bilan ularning tashabbuslarini qo‘llab-quvvatlash boʻyicha qoʻshimcha imkoniyatlarga bagʻishlangan ochiq muloqotida har haftaning payshanba kuni “Yoshlar kuni” etib belgilanishi yangi O‘zbekiston taraqqiyot strategiyasida yoshlar siyosati mutlaqo yangi bosqichga ko‘tarilganini anglatadi. Davlatimiz rahbari ta’kidlaganlaridek: “Yoshlar – Yangi O‘zbekistonning tayanchi va hal qiluvchi kuchidir. Ularning bilim va salohiyati – mamlakat kelajagining mustahkam poydevoridir”.
Mazkur tashabbus amaliy ifodasi sifatida FVV Akademiyasida Toshkent shahar Uchtepa tumanida joylashgan umumtaʼlim maktablari oʻqituvchi va o‘quvchi-yoshlari va ularning ota-onalari uchun "Yoshlar kuni" doirasida "Ochiq eshiklar kuni" o‘tkazildi.
Akademiya hududiga tashrif buyurgan yoshlarni Akademiya Madaniyat markazi ijodkorlari tomonidan tantanali kuy-qo‘shiqlar ostida samimiy kutib olindi. Milliy ruh, ko‘tarinki kayfiyat va faxr tuyg‘usi tadbir boshidan yoshlarda yuksak motivatsiya uyg‘otdi.
Mazkur tadbirda Toshkent shahar Uchtepa tumani hokimiyati va sektor mas’ul rahbarlari, 100 nafardan ortiq tuman umumta’lim maktablarining o‘quvchi-yoshlari, ularning murabbiylari va ota-onalari, FVV Akademiyasi professor-o‘qituvchilari, harbiy xizmatchilari, kursantlar, keng jamoatchilik hamda OAV vakillari ishtirok etdi.
Tadbir avvalida, yoshlar o‘quv minorasining 4-qavatidan jabrlanganni qutqarish hamda o‘zini-o‘zi qutqarish bo‘yicha amaliy mashg‘ulotlarni kuzatdilar. Bu jarayonda tezkorlik, qat’iyat va professional mahorat uyg‘unligi namoyon bo‘ldi. Undan tashqari yong‘in-qutqaruv maxsus texnikalarining texnik xususiyatlari va shartli yong‘in sodir bo‘lganda kursantlarning jangovar yoyilishi ko‘rgazmasi esa yoshlarni sohaga bo‘lgan qiziqishlarini yanada oshishiga sabab bo‘ldi.
Akademiya katta stadionida zamonaviy yong‘in-qutqaruv texnikalari namoyish etildi. Har bir texnik vositaning imkoniyati, favqulodda vaziyatlardagi o‘rni va samaradorligi haqida batafsil ma’lumot berildi. Shuningdek yoshlar Axborot-resurs markazida tashkil etilgan kitobxonlik soatlarida ishtirok etib, qutqaruvchilik, yongʻin xavfsizligi, fuqaro muhofazasi, huquqshunoslikka oid va turli badiiy adabiyotlar bilan yaqindan tanishdilar. O‘quv auditoriyalarida kursantlarning dars jarayonini kuzatish orqali yoshlar o‘zlari uchun motivatsiya oldilar.
Shu bilan birga, bugungi kunda favqulodda vaziyatlarda ko‘maklashish yo‘nalishida ham ko‘ngilli volontyor yoshlarning faolligi tobora ortib bormoqda. Ayniqsa, tabiiy ofatlar, yong‘inlar, qidiruv-qutqaruv ishlari hamda profilaktik targ‘ibot tadbirlarida yoshlarning tashabbuskorligi va mas’uliyati yaqqol namoyon bo‘lmoqda. Favqulodda vaziyatlar sohasidagi volontyorlik harakati yoshlarni nafaqat ijtimoiy faollikka, balki qutqaruvchilik kasbiga bo‘lgan qiziqishini ham kuchaytirmoqda. Bugungi kunda ko‘plab yoshlar aynan volontyorlik faoliyati orqali ushbu sohaning mazmun-mohiyatini anglab, kelgusida professional qutqaruvchi bo‘lishni maqsad qilmoqda. Bu esa Yangi O‘zbekiston yoshlari orasida inson hayotini asrash, jamiyat xavfsizligini ta’minlash va Vatan ravnaqi yo‘lida fidoyilik bilan xizmat qilishga bo‘lgan intilish tobora kuchayib borayotganidan dalolatdir.
