Turkmaniston Xalq Maslahati raisi Gurbanguli Berdimuhamedovning “Tafakkur gavhari” nomli kitobi taqdimoti boʻlib oʻtdi

Bugun O‘zbekiston Respublikasi Prezidenti huzuridagi Davlat boshqaruvi akademiyasida turkman xalqining Milliy lideri, Turkmaniston Xalq Maslahati raisi Gurbanguli Berdimuhamedovning “Tafakkur gavhari” nomli kitobi taqdimoti boʻlib oʻtdi. 

Marosimda O‘zbekiston Respublikasi Prezidenti Administratsiyasi vakillari, Oliy Majlis Senati va Qonunchilik palatasi a’zolari, vazirlik va idoralar,mamlakatimizdagi milliy madaniy markazlar, ilm-fan, ta’lim va madaniyat, ijod sohalarining taniqli namoyandalari hamda ommaviy axborot vositalari xodimlari ishtirok etdi. 

Tadbirda O‘zbekiston Respublikasi Prezidentining tashqi siyosat masalalari bo‘yicha maxsus vakili Abdulaziz Komilov, Davlat boshqaruvi akademiyasi rektori Adham Bekmurodov, O‘zbekiston Yozuvchilar uyushmasi raisi, senator Sirojiddin Sayyid, akademik Shuhrat Sirojiddinov, “Jahon adabiyoti” jurnali bosh muharriri, O‘zbekistonda xizmat ko‘rsatgan jurnalist Ahmadjon Meliboyev, O‘zbekiston kinematografiya agentligi direktori Shuhrat Rizayev, O‘zbekiston Fanlar akademiyasi vise-prezidenti, professor Bahrom Abduhalimov, filologiya fanlari doktori Bahodir Karimov, rejissyor Muzaffarxon Erkinov, Turkman milliy madaniy markazi rahbari, O‘zbekiston Respublikasi Oliy Majlisi Qonunchilik palatasi deputati Guldana Avezdurdiyeva va boshqalar soʻzga chiqib, keyingi yillarda O‘zbekiston va Turkmaniston o‘rtasida o‘zaro ishonch va yaqin qo‘shnichilikka asoslangan keng ko‘lamli hamkorlik aloqalari butunlay yangi bosqichga ko‘tarilayotganini alohida ta’kidladilar. 

Har ikki davlat rahbarlari –O‘zbekiston Respublikasi Prezidenti Shavkat Mirziyoyev, Turkmaniston Prezidenti Serdar Berdimuhamedov va Turkmaniston Xalq Maslahati raisi Gurbanguli Berdimuhamedov tomonidan amalga oshirilayotgan xalqparvar siyosat, oliy darajadagi tashriflar natijasida mamlakatlarimiz o‘rtasidagi siyosiy-iqtisodiy, madaniy-gumanitar aloqalar tobora kengayib bormoqda. Anjuman ishtirokchilari bu borada ham oʻz fikr-mulohazalarini bildirib, kelgusida ikki davlat oʻrtasidagi aloqalar yanada mustahkamlanib borishiga ishonch bildirdilar. 

Ta’kidlash joizki, O‘zbekiston Respublikasi Prezidentining 2024 yil 19 fevraldagi “Buyuk turkman shoiri va mutafakkiri Maxtumquli Firog‘iy tavalludining 300 yilligini keng nishonlash to‘g‘risida”gi qarori asosida mamlakatimizda bu qutlug‘ ayyom keng nishonlandi. 

Ushbu sana munosabati bilan o‘tgan yili Ashxobod shahrida o‘tkazilgan xalqaro forumda O‘zbekiston Respublikasi Prezidenti Shavkat Mirziyoyev “Maxtumquli Firog‘iyning 300 yilligi” esdalik medali bilan taqdirlandi. Bularning barchasi xalqlarimiz o‘rtasidagi do‘stlik va qardoshlik munosabatlari yanada mustahkamlanib borayotganidan dalolat beradi.

Anjumanda so‘zga chiqqanlar Gurbanguli Berdimuhamedovning “Tafakkur gavhari” kitobi ham ana shunday ezgu maqsadlarga xizmat qilishi bilan ulkan ahamiyatga ega ekanini e’tirof etishdi.