Vazir ustamasi uchun bo‘sh qolgan joylar uchun qayta test sinovi o‘tkaziladimi?

Xabaringiz bor, joriy yil 25-fevral kuni respublikamiz bo‘ylab Vazir jamg‘armasi hisobidan har oylik ustama olish uchun test sinovlari bo‘lib o‘tgandi. 2025-yil uchun ajratilgan 1500 ta kvotalar uchun 27 ta fan yo‘nalishi bo‘yicha ro‘yxatga olingan 4499 nafar nomzodning 4434 nafari test sinovlarida ishtirok etdi.

Maktabgacha va maktab ta’limi vazirligi esa ushbu test sinovlaridan keyingi bosqichga o‘tgan (80 va undan yugori ball olgan)larning dastlabki umumiy soni: 988 nafarni tashkil etganini ma’lum qildi.

Ya’ni, 2025-yil uchun ajratilgan kvota bu yil ham to‘lmay, jami 512 ta joy bo‘sh qoldi. Bugun, 28-fevral kuni Maktabgacha va maktab ta’limi vazirligi rahbariyati ishtirokida bo‘lib o‘tgan matbuot anjumanida ushbu kvotalarni to‘ldirish uchun qayta test sinovi o‘tkaziladimi, degan savol bilan vazir o‘rinbosari Sardor Radjabovga yuzlandik: 

Hech kimga sir emaski, hududlardagi ta’lim tizimini isloh qilish bo‘yicha hududiy kengashlar tomonidan tuman(shahar) uchun belgilangan kvotaga nisbatan nomzodlarni saralash uchun vazirlik (Ishchi guruh)ga taqdim etishda shaffoflik mavjud emas. 

Haqiqiy nomzodlarning aksariyati vazirlikka taqdim etilmaganligi uchun har yili vazirlik tomonidan belgilangan kvota to‘lmay qoladi.

Misol uchun, 2023-yili vazir ustamasi uchun kvota 2000 nafar etib belgilanib, ulardan 1697 nafari vazir ustamasiga tavsiya qilingan. 2024-yilda esa ushbu kvota 1250 nafar etib belgilanib, ulardan 1005 nafarigina vazir ustamasiga tavsiya qilingan.

Ammo 2023-yilda ham, 2024-yilda ham vazir ustamasi uchun kvotalar soni to‘lmay qolgan bo‘lsa-da, Maktabgacha va maktab ta’limi vazirligi tomonidan ushbu kvotalarning o‘rnini to‘ldirish uchun harakat qilinmagan. Vaholanki, Vazirlar Mahkamasining 2022-yil 2-avgustdagi 425-son qarori bilan tasdiqlangan “Vazir jamg‘armasi to‘grisidagi nizom”ning 6-bobida har oylik ustama va bir martalik pul mukofoti uchun ajratilgan kvotalar asosida nomzodlar saralanmay qolgan yoki mukofot va ustama oluvchi shaxslar soni kvotadan kam bo‘lgan taqdirda, Ishchi guruhning tegishli qaroriga muvofiq kvotalarni qayta ko‘rib chiqish vakolati bilan qo‘shimcha saralash o‘tkazilishiga ruxsat berilgan. Bu yil vazir ustamasi uchun bo‘sh qolgan kvotalar o‘rnini qoplash uchun qayta test sinovlari o‘tkaziladimi?

Ushbu savolga Maktabgacha va maktab ta’limi vaziri O‘rinbosari Sardor Radjabov quyidagicha javobberdi:

“Demak, 1 500 ta kvota ajratilgan, oldingi vyillarda ham shunday holat bor edi. “425” ga ham o‘zgartirishlar kiritilganligining asosiy sababi shu edi. Bizga kelayotgan nomzodlar, tavsiya bilan kelayotgan nomzodlar kerakli balni to‘play olmayapti. Hozirgi, amaldagi tartib bo‘yicha, agar shu tartib bo‘yicha ish ko‘radigan bo‘lsak, biz yana bir marta hududiy kengashlardan nomzodlar ro‘yxatini olib, hududiy kengash komissiyalari ishlab, yana boshqatdan ustozlarni bizga berish kerak bo‘ladi. Shundan keyin biz yana bir marta ulardan test o‘tkazishimiz mumkin edi. Lekin aytib o‘tganimizdek, hozir o‘zgartirish, qo‘shimcha kiritildi va nizom o‘sha imzolangan kundan keyin kuchga kiradi, yuridik nuqtayi nazardan. Shu sababli ham hozir toifaga bog‘landi va siz aytayotgan raqamlar bo‘yicha e’tirozlar va apellyatsiya komissiyasi xulosasi hali chiqmagan. Shu sababli ham hozir toifaga bog‘landi va siz aytayotgan raqamlar bo‘yicha e’tirozlar va apellyatsiya komissiyasi xulosasiga hali chiqmagan. Bu borada hali apellyatsiya komissiyasi xulosasini ham ko‘rib chiqamiz. Shundan so‘ng, ikkinchi bosqichga o‘tiladi. Bu degani, aytib o‘tilgan o‘qituvchilarning hammasi ham vazir ustamasini oladi degani emas. Chunki ikkinchi bosqichda ularni yana bir sinov kutmoqda, ya’ni ularni komissiya oldida taqdimotlari ham bor”. Vazir o‘rinbosarining javobidan shuni tushunish mumkinki, vazir ustamasi uchun to‘lmay qolgan kvotalarga qayta test sinovi o‘tkazilmaydi.