O‘ZBEK ME’YORIY LUG‘ATCHILIGI yoxud lug‘at qonunchiligi muammolariga doir

Ma’lumki, leksikografiya taraqqiyoti – bu jamiyat, millat, ilm-fan taraqqiyoti degani. Ya’ni muayyan tilda muayyan tipdagi lug‘atga ehtiyoj paydo bo‘libdimi, demak, mamlakatda shu soha rivojlanyapti. Bugungi kunda amaliy leksikografiya shu qadar taraqqiy etdiki, hatto bir lug‘atning deyarli qayta ishlanmagan yangi nashri nomiga katta-kichik, o‘quv, akademik, universal, zamonaviy, yangi, eng yangi kabi foydalanuvchining diqqatini jalb qilish, raqobat muhitida yutib chiqishga qaratilgan jumlalar qo‘shilgan son-sanoqsiz nashrlari yuzaga keldi. Biroq ushbu lug‘atlarning sifati qay darajada, ularning ishonchliligi kafolatlanganmi? Umuman, lug‘at nashri va lug‘at tijoratini qaysi tashkilot nazorat qiladi?

Kitob javonlari va elektron kitob do‘konlarini kuzatsangiz, eng ko‘p qidirilayotgan, eng katta daromad keltirayotgan kitob – lug‘atlar ekanining guvohi bo‘lasiz. Shak-shubhasiz aytish mumkinki, ayni paytda nashriyotlar uchun lug‘at savdosi eng serdaromad soha, lug‘atlar tijorat vositasiga aylandi. Shuni unutmaslik kerakki,  lug‘at talabdan kelib chiqib taklif qilinayotgan faqat tijoriy mahsulot emas, u, birinchi navbatda, o‘zi yaratilgan davrning ko‘zgusi hamdir. Agar gap hammamiz maktabda ilk bor uchratgan lug‘atimiz, tilning ilmiy me’yorlari, joriy imloning huquqiy asosi hisoblangan imlo lug‘atlari haqida ketayotgan bo‘lsa-chi?

Taniqli lug‘atshunoslar V.A.Kozirev va V.D.Chernyak “Ortologik lug‘at va nutq madaniyati” nomli maqolasida so‘nggi yillarda nutqiy savodxonlikka o‘rgatish bilan bog‘liq lug‘atlar taqchilligi o‘ziga xos “leksikografik portlash”ni yuzaga keltirgani, kitob javonlarida sanoqsiz imlo lug‘atlari mavjud bo‘lsa-da, ularning barchasi ishonch­li emasligini afsus bilan ta’kidlaydi. Modomiki, leksi­kografiya sohasidagi yutuqlari bilan jahon leksikografiyasida o‘zining munosib o‘rniga ega bo‘lgan tilda imlo lug‘atlari ishonchliligiga kafolat yo‘q ekan, bugungi kunda o‘zbek adabiy tilining huquqiy-me’yoriy asoslari qay darajada mustahkam, o‘zbek tilida adabiy tilning imloviy me’yorlarini belgilash, barqarorlashtirish, takomillash­tirish hamda kommunikativ kompetentlilikni shakllantirish va muloqot madaniyatiga o‘rgatishning muhim vositasi, yozma nutq ilmiy me’yorlarining huquqiy asosi hisoblangan imlo lug‘atlarimiz, xususan, maktab imlo lug‘atchiligi ahvoli qay darajada, bu borada qanday muammolari­miz bor, uning ilmiy, amaliy yechimlari nimaga bog‘liq? Zamonaviy tilshunoslikda o‘zbek tili ilmiy me’yorlarining til tizimi va uzus bilan bog‘liq ravishda harakatdagi va tari­xiy o‘zgaruvchanligini o‘rganish yuzasidan qanday ishlar amalga oshirilyapti, nutqning to‘g‘riligi haqidagi mavjud nazariyalar qay darajada ustuvor? Bu kabi savollarning kun tartibiga qo‘yilishi tabiiy, albatta. 

Imlo lug‘ati adabiy rasmiy tilning yozma shaklidagi barqarorlikni ta’minlaydi, me’yorni belgilab beradi. U imlo qoidasiga mos yaratiladi. Imlo qoidasi huquqiy asosga ega, u hukumat qarori bilan tasdiqlanadi va shundan keyin kuchga kiradi, tuzilayotgan imlo lug‘atlari uchun asos vazifasini o‘taydi. Afsus bilan aytish kerakki, so‘nggi yillarda mutaxassis sifatida bizga berilayotgan eng og‘riqli, eng ko‘ngilni g‘ash qiladigan savollardan biri – “Qaysi imlo lug‘ati to‘g‘ri?”. Bu qanaqa savol? Nahotki imlo lug‘ati bo‘ladi-yu, uning to‘g‘ri-noto‘g‘risi bo‘lsa! Haqiqatan ham, bugungi kunda o‘zbek tili rasmiy amal qilinadigan doiralarda biz qaysi imlo lug‘atiga asosan ish ko‘rishimiz kerak?! So‘nggi besh-o‘n yil ichida turli mualliflar tomonidan yigirmaga yaqin katta-kichik imlo lug‘atlari nashr etilgan. Deyarli barchasining birinchi sahifasida “O‘zbekiston Respublikasi Fanlar akademiyasi O‘zbek tili, adabiyoti va folklori instituti ilmiy kengashi nashrga tavsiya etgan” deb yozib qo‘yilgan. Ularning hammasi amalda, birortasi rasman inkor etilmagan. Yuqoridagi kabi savollarning o‘z-o‘zidan tug‘ilmayotganini mazkur lug‘atlarda bir necha so‘zning imlosidagi tafovutlarni keltirish bilan asoslash qiyin emas.

Eng ko‘p murojaat qilinayotgan elektron lug‘atlar, veb-muharrir, turli mobil qurilmalarda ishlashga mo‘ljallangan, matndagi ham imloviy, ham uslubiy xatolarni tuzatish, savodxon yozish uchun xizmat qiladigan matn tekshiruvi dasturlari haqida ham shu gapni aytish mumkin. Negaki, ularning lingvistik ta’minoti yuqoridagi lug‘atlarga borib taqaladi. Imlo lug‘atini xohlagan kishi, xohlagan payti qay­ta-qayta o‘zgartirib nashr etaverishga haqli emas! Bu nafaqat ziyoli qatlamni chalg‘itadi, balki o‘qish-o‘qi­tish ishlariga ta’sir etadi, eng asosiysi, milliy til me’yorlarining qat’iyligiga putur yetkazadi. Ayni paytda bir necha imlo lug‘atining rasman amalda ekani yuqorida aytilganidek “Qaysi imlo lug‘ati to‘g‘ri?” degan g‘ayri­odatiy savolning yuzaga kelishiga sabab bo‘lyapti. Ochig‘i, hozir sentabrmi, sentyabrmi? – degan savolga aniq javob bera olmasligimiz achinarli. 

O‘zbek adabiy tilining joriy me’yorlarini mustahkam­lash, yozma va og‘zaki nutqning amaldagi qoidalarini takomillashtirish vazifasini bajaruvchi ortologik vositalar – me’yoriy lug‘atlarni tuzish nazariyasi va amaliyoti bilan shug‘ullanuvchi imlo lug‘atchiligimizning naqadar ayanchli ahvoldaligini allaqanday havaskor lug‘atchilar tomonidan tijoriy maqsadda nashrga tayyorlangan saviyasi haminqadar bo‘lgan lug‘atlar asosida emas, respublikada me’yoriy lug‘atlarni chop etishga mas’ul, bu sohaga yo‘naltirilayotgan katta-katta mablag‘lardan foydalanish imkoni yuqori bo‘lgan, sohaning eng yetuk mutaxassislari tomonidan tuzilgan imlo lug‘atlari misolida asoslashga harakat qilamiz.

1976-yilda S.I.Ibrohimov rahbarligida nashrga tayyorlangan kirill yozuvidagi 65 ming so‘zli, o‘z davri uchun akademik imlo lug‘ati maqomida bo‘lgan eng so‘nggi va mukammal imlo lug‘ati – “O‘zbek tilining imlo lug‘ati” so‘zboshisida quyidagi jumlalarni o‘qiymiz: “Adabiy tilning imloviy normalarini belgilash nihoyatda qiyin va mas’uliyatli ishdir. Imlo masalalari o‘zbek tilshunosligida hali yetarli ishlanmagan va ilmiy umumlashtirilgan emas. Asar mualliflari buni to‘lig‘icha his etishadi va lug‘atda berilgan ba’zi so‘zlarning imloviy shakllari haqida boshqacharoq qarashlarning bo‘lishi ehtimolligini inkor etishmaydi”. Mazkur lug‘at chop etilgandan salkam qirq yil o‘tib – 2013-yili professor N.Mahmudov tahriri ostida E.A.Begmatov va A.P.Madvaliyevlar muallifligida nashr etilgan imlo lug‘ati so‘zboshisida yana aynan shu kabi jumlalar takrorlanadi: “Adabiy tilning imloviy me’yorlarini belgilash g‘oyatda mas’uliyatli va qiyin ishdir. O‘zbek lug‘atchiligi tarixi­da hozirga qadar turli tipdagi o‘nlab imlo lug‘atlari tuzilgan bo‘lsa-da, bu tip lug‘atlarni tuzishning ilmiy asos va tamoyillari, lug‘atga kiritish lozim bo‘lgan materialning xarakteri va tarkibi, imlo lug‘atlari bilan kundalik yozuv amaliyotida yuz beradigan tafovutlar va ushbu asosda imlo qoidalarini takomillashtirib borish kabi ko‘pgina masalalar o‘zbek tilshunosligida hali yetarli tadqiq qilinmagan hamda nazariy asoslanmagan (ta’kid bizniki – B.B.)”. 

Oradan yana o‘n yil o‘tib 2023-yilda O‘zbekiston Res­publikasi Fanlar akademiyasi O‘zbek tili, adabiyoti va folklori instituti ilmiy kengashi tavsiyasiga ko‘ra, Davlat tilini rivojlantirish masalalari departamenti buyurtmasiga binoan O‘zbek tilini rivojlantirish jamg‘armasi mablag‘lari hisobidan nashr etilgan “27 000 ortiq (lug‘at sarvarag‘ida aynan shunday yozilgan!) so‘z va so‘z-shakl­larning to‘g‘ri yozilishi ko‘rsatib berilgan” “O‘zbek tilining o‘quv imlo lug‘ati” so‘zboshisida yana aynan yuqoridagi havolani uchratamiz: “Adabiy tilning imloviy me’yorlarini belgilash g‘oyatda mas’uliyatli va qiyin ishdir. O‘zbek lug‘atchiligi tarixida hozirga qadar turli tipdagi o‘nlab imlo lug‘atlari tuzilgan bo‘lsa-da, bu tip lug‘atlarni tuzishning ilmiy asos va tamoyillari, lug‘atga kiritish lozim bo‘lgan materialning xarakteri va tarkibi, imlo lug‘atlari bilan kundalik yozuv amaliyotida yuz beradigan tafovutlar va shularga bog‘liq holda imlo qoidalarini takomillashtirib borish kabi ko‘pgina masalalar o‘zbek tilshunosligida hali yetarli tadqiq qilinmagan”.

Xo‘sh, biz qachongacha “bu tip lug‘atlarni tuzishning ilmiy asos va tamoyillari, lug‘atga kiritish lozim bo‘lgan materialning xarakteri va tarkibi, imlo lug‘atlari bilan kundalik yozuv amaliyotida yuz beradigan tafovutlar va shularga bog‘liq holda imlo qoidalari­ni takomillashtirib borish kabi ko‘pgina masalalar o‘zbek tilshunosligida hali yetarli tadqiq qilinmagan” deb vaziyatdan chiqamiz? O‘zbek tili imlo lug‘atchiligi tarixida eng katta nusxada nashrga tayyorlangan, nashri davlat tomonidan moliyalashtirilgan yuqorida keltirilgan uch lug‘atda ellik yildan buyon biridan ikkinchisiga ko‘chib yurgan satrlar­ning o‘ziyoq o‘zbek tilida imlo lug‘atchiligi ahvoli qay darajada ekanini ochiq-ravshan ko‘rsatmayaptimi? Yarim asr o‘tib ham bu tip lug‘atlarni tuzishning ilmiy asos va tamoyillari o‘zbek tilshunosligida hali yetarli tadqiq qilinmagan hamda nazariy asoslanmagan bo‘lsa, imlo lug‘atlarida nima ayb?! Buni yana qancha kutish mumkin? Alifbodagi to‘rtta harfni o‘zgartirish ustida besh-olti yildan buyon bir qarorga kela olmayotgan tilshunosligimiz qachon imloni tartibga solishga diqqatini qaratadi? Qachon adabiy tilning oynasi bo‘lgan yozma savodxonlikni oshirish, antroposentrik paradigmaning asosiy tadqiq omili til egasi – insonni tildan to‘g‘ri foydalanishga o‘rgatishga qaratilgan haqiqiy amaliy tadqiqotlarga yo‘l ochib beramiz? 

MUAMMONING YECHIMI QAYERDA?

Imloga doir asosiy muammolar o‘zlashma so‘zlar­ning yozilishi doirasida kuzatilmoqda. Joriy imlo qoidalari bo‘yicha yozilishida muammo yuzaga kelayotgan aksariyat so‘zlar asli lotincha bo‘lib, rus orfografiyasi prinsiplari asosida yozilgan, o‘zbek tiliga to‘g‘ridan to‘g‘ri emas, vositachi til – rus tili orqali o‘zlashgan. Ikki undosh o‘rtasida y orttiriladigan so‘zlarni yozishda bir prinsip asosida yondashib bo‘lmaydi. Bu so‘zlarning aksariyati lotincha bo‘lib y siz yozilgan: alumen aluminis. Inglizcha lug‘atda aluminium. Rus tilida алюминий. O‘zbek tilida aluminiy shaklini tanlagan ma’qul. Ba’zi so‘zlar imlosini belgi­lashda fonetik xususiyatiga ham qarash kerak. Ba’zan u ni tushirish so‘z etimologiyasiga ta’sir etishi ham mumkin: avantyurizm – avanturizm. 

O‘zbek tilining imlo qoidalari tasdiqlangandan so‘ng nashr qilingan imlo lug‘atlarida nutqimizda faol ishlati­ladigan ko‘pgina o‘zlashma so‘zlarning imlosi belgilangan bo‘lib, ular lug‘at boshida berilgan imlo qoidalariga mos edi. Ayrim so‘zlar imlosi talaffuz uchun erish tuyulsa-da(октябрь/oktabr, тюлень/tulen, шляпа/shlapa, этюд/etud, пляж/plaj, дюйм/duym), o‘tgan davr mobaynida mazkur lug‘at asosida yaratilgan darsliklar, o‘quv qo‘llanmalari, ommaviy axborot vositalari sabab omma shu shaklga moslasha boshlagan edi. Mazkur lug‘at ayrim kamchiliklardan xoli bo‘lmasa ham, imloda asosiy muam­mo keltirib chiqarayotgan tarkibida е, ё, ю, я grafemalari ishtirok etgan so‘zlar imlosini belgilashda xalq jonli talaffuzini inobatga olgan holda bitta prinsipdan kelib chiqib yondashilmagan edi. Masalan, byuro, byurokrat, byust, gravyura, dvoryan, kompyuter, plyonka so‘zlari va glukoza, aluminiy, rukzak, illuziya, sujet, parashut, agglutinativ so‘zlari imlosini belgilashda individual yondashilgan edi.  Shuningdek, tarkibida ц harfi bo‘lgan so‘zlar imlosini berishda ham talaffuz(fonetik yozuv) va asliga tayanishda (shakliy yozuv) muvozanat saqlangan edi: litsey, aksiya, antisiklon kabi. Shu o‘rinda aytib o‘tish kerakki, keyingi imlo lug‘atlarida “Imlo qoidalari”ga qo‘shimcha izohning berilishi tarkibida ц harfi bo‘lgan so‘zlarni yozishda bir prinsipga tayanishga olib keldi va jonli talaffuz hamda imlo o‘rtasida nomuvofiqlikni yuzaga keltirdi: публицистик – publitsistik, процессуал – protsessual, полицмейстер – politsmeyster, плацкарта – platskarta, пацифизм – patsifizm, лейкоцит – leykotsit, классицизм – klassitsizm, коэффициент – koеffitsiyent, фармацевтика – farmatsevtika, эритроцит – eritrotsit, процент – protsent, процессор – protsessor, ациклик – atsiklik, ацетон – atseton, бициклик – bitsiklik, бицилиндр – bitsilindr, гидроцилиндр – gidrotsilindr, гидроцентр – gipotsentr, гомоцентрик – gomotsentrik va h.k. Abssess, abssissa, ssenariy, ssintigramma, ssuda, krossbriding, krossvord kabi so‘zlarning yozilishi ham talaffuzga mos emas. Hatto rus orfografiyasida ham с va ц harfli so‘zlarni yozishda qat’iy bir prinsipga tayanilmaydi. Undoshlarning bir bo‘g‘inda qator yoki takror kelishi turkiy tillarga xos bo‘lmaganligi sababli abssess (ingl. abscess) kabi so‘zlardagi takror qo‘llangan undoshlar tili­mizda bir tovush bilan talaffuz qilinadi. Mavjud o‘zlashma so‘zlarda ham undoshlarning takror qo‘llanishi, asosan, so‘z oxirida uchraydi: металл, ватт, грамм, кросс, стафилакокк, кристалл kabi. 5-sinf “Ona tili” darsligida: “Gramm, metall, kongress kabi so‘zlar oxirida kelgan qo‘sh undoshlardan biri talaffuzda tushirib qoldirilsa ham, yozuvda hamisha ifodalanadi. Bunday undosh bilan tugagan so‘zlarga shunday tovush bilan boshlanadigan qo‘shimchalar qo‘shilganda, qo‘sh undoshning biri yozilmaydi: metall+-lar→metallar” tarzida qoidalashtiriladi. Shu sababli so‘z oxiridagilarini saqlab qolib, so‘z boshi va o‘rtasi variantini bir tovush bilan ifodalash lozim: ssenariy / senariy, ssintigramma / sintigramma, krossbriding / krosbriding, krossvord / krosvord kabi. Bunday holatda, bizningcha, umumiy bitta prinsipdan kelib chiqib emas, har bir so‘zning imlosiga individual yondashish maqsadga muvofiq.

Shuningdek, arab yoki fors-tojik tilidan o‘zlashgan qator imlosi muammoli so‘zlar, masalan: talafot-talofat-talofot, naqorat-naqarot, hashorat-hasharot, junbish-jumbish-junbush, arosat-arasot kabi so‘zlarning, qolaversa, nafaqat tor doiralar, hatto rasmiy doiralarda tilning joriy ilmiy me’yorlarini “nazar-pisand qilmay” qo‘llanishi ommalashayotgan so‘z: Google, beeline, usell, е-mail, You Tube, Chrom, Galaxy, SHAREit, telegramm, Wi-Fi, WhatsApp, Iphon (ayfon), Windows; jumla: Мы открылись, Мой сам, I ❤️ Qarshi; chala o‘zlashma: siti, sorri, gud bay, bay-bay, o key, chao, pliz, mersi  каби турли кўринишдаги термин-варваризмлар, миллий тил учун yot birliklarning  ilmiy asoslangan ortologik shaklini belgilash zamonaviy o‘zbek ortografiyasining dolzarb masalalaridan hisoblanadi.   

Yuqoridagilar mustaqil davlatning rasmiy tili bo‘lgan ona tilimizning ilmiy me’yorlarini belgilab beradigan

yagona va mukammal imlo lug‘atini yaratish yoki ular ichidan eng ma’qulini tanlab rasman e’lon qilishni talab etadi. Bir paytda bir necha mualliflarning subyektiv yondashuvi asosida tuzilgan imlo lug‘atining rasman amalda bo‘lishi imloni izdan chiqarishi tabiiy. Dunyoning aksariyat rivojlangan davlatlarida me’yoriy lug‘atlar, aynan orfografik lug‘atlarni tayyorlash va chop etish hukumat nazoratidagi strategik masalalardan hisoblanadi. Masalan, Amerikada lug‘at qonunchiligi degan tushuncha shakllangan bo‘lib, hozirga qadar S.Jonson lug‘ati (“A Dictionary of the English Language”, 1755) imlo lug‘atlarini yaratish uchun me’yoriy-huquqiy asos bo‘lib kelmoqda. Jonson o‘z davrida me’yorlarni o‘zgartirish tarafdori bo‘lgan yagona olim hisoblangan. “Ingliz tili lug‘ati” so‘zboshisida u “Qoida, me’yorsiz natija samarali bo‘ladi. Inglizlar qat’iy me’yorni talab etadi. Til esa tabiatan o‘zgaruvchan. Uni bir me’yorda ushlab turib bo‘lmaydi. Balki me’yorni o‘zgartirish kerakdir” degan fikrni o‘rtaga tashlaydi. 

Amerikaning XIX asrdagi ikki buyuk leksikografi N.Vebster va J.E.Vorsester Jonson lug‘ati asosida o‘z faoliyatlarini boshlaydilar. Garchi Vebster keyinchalik Jonson lug‘atining ayrim me’yorlarini o‘zgartirish borasida keskin mulohazalar bildirgan va imlo islohoti tashabbuskori sifatida “Universal and Critical Dictionary of the English Language“ lug‘atini tuzgan bo‘lsa-da, Jonson lug‘atiga “u nashr etilgandan buyon bu til uchun bunday standart boshqa ishlab chiqilmagan” deb baho beradi. Mutaxassislar orasida quyidagi jumla tez-tez ishlatiladi: “Amerika Konstitutsiyasi o‘zgartirilmaguncha, Jonsonning lug‘ati Amerika qonunchiligida muhim rol o‘ynayveradi”.

Ingliz tilida ayni paytda boshlang‘ich sinf o‘quvchilariga mo‘ljallangan imlo lug‘atlarining aksariyati “Barrington Stoke” bolalar nashriyoti tomonidan nashr etilsa, maktab o‘quvchilariga mo‘ljallangan lug‘atlar, odatda, Oksford universiteti nashriyotida “Oxford Dictionaries” seriyasida chop etiladi. Lug‘at qonunchiligi bilan bog‘liq ushbu tajriba Rossiyada ham amalda. Rossiyada Ta’lim va fan vazirligi me’yoriy lug‘atlarni aprobatsiyadan o‘tkazish va chop etish bo‘yicha yagona tizimni shakllantirgan bo‘lib, bu vazifa bilan shug‘ullanish huquqiga ega bo‘lgan nashriyotlar ro‘yxatini tasdiqlagan. Unga ko‘ra ayni paytda zamonaviy rus tilidan foydalanilganda Rossiya Federatsiyasining davlat tili darajasida yondashadigan maxsus tashkilotlar – Rossiya Fanlar akademiyasining Rus tili instituti, “AST-PRESS”, “Flinta” nashriyotlari ushbu huquqni qo‘lga kiritgan.

Leksikograflar, odatda, til qonuniyatlarini me’yorda ushlab turish tarafdori bo‘ladi, til esa turli yo‘l bilan tinimsiz boyib, taraqqiy etib boradi. Bu, o‘z-o‘zidan, me’yorlarni mutlaqlashtirmaslik, muayyan davrlarda isloh qilish zaruratini yuzaga keltiradi. Tilda imlosi muammoli so‘zlar talay. Imlo lug‘ati tilda paydo bo‘lgan yangi so‘zni zudlik bilan qamrab ololmaydi. Ziyoli qatlam, omma uni o‘zicha transliteratsiya qila boshlaydi. Aslida me’yor amaliyotga asoslanadi, uzusdan kelib chiqadi. Agar tilda lug‘atda aks etmagan muayyan so‘zni ko‘pchilik muayyan shaklda yozishga odatlangan bo‘lsa, shu shakl ortogramma sifatida tan olinadi. 

Yuqoridagilar mamlakatimizda me’yoriy lug‘atlar nashrini qat’iy nazoratga olish, lug‘at qonunchiligi darajasiga ko‘tarish, mamlakatning eng kuchli, nufuzli olimlari, pedagoglarini unga jalb qilish, eng ishonchli nashriyotlar va ilmiy-tadqiqot markazlariga mazkur ish bilan shug‘ullanish huquqini berish zaruratini yuzaga keltirmoq­da. Shuning o‘ziyoq bugungi kunda amaliy tilshunoslik­ning imloga doir ilmiy-nazariy tavsiflarni ishlab chiqish bilan bir paytda ularni amaliyotga kiritish, tatbiq qilish jarayonlarini ham qamrab oladigan ortologiya, ortografiya, lingvodidaktika, pedagogik leksikografiya kabi zamonaviy yo‘nalishlarining mamlakatning bevosita til siyosatini amalga oshirish vazifasi yuklatilgan sohalari sifatida tan olinishi, bu sohaga oid tadqiqotlarning davlat tomonidan qo‘llab-quvvatlanishi, moliyalashtirilishi, huquqiy kafolatining ta’minlanishini taqozo etmoqda. 

Bashorat BAHRIDDINOVA, 

QarDU professori, 

filologiya fanlari doktori