Sog‘lom turmush sari yana bir odim

O‘zbekiston xalqaro islomshunoslik akademiyasida “Hamkorlik kubogi” sport musobaqasi bo‘lib o‘tdi.

Mazkur bellashuvlar “Dolzarb 90 kun” loyihasi doirasida Oliy ta’lim, fan va innovatsiyalar vazirligi hamda Sport vazirligi hamkorligida tashkil etilib, poytaxtimizdagi bir qator oliy ta’lim muassasalari xodimlarini birlashtirdi. Jarayonda Toshkent davlat yuridik universiteti, Toshkent davlat iqtisodiyot universiteti, Toshkent davlat sharqshunoslik universiteti, O‘zbekiston davlat san’at va madaniyat instituti hamda O‘zbekiston xalqaro islomshunoslik akademiyasi jamoalari mini futbol, voleybol, stol tennisi, shaxmat-shashka va kibersport yo‘nalishlarida kuch sinashdi.

Yakuniy natijalar bo‘yicha:

🔹Mini futbolda g‘oliblik Toshkent davlat iqtisodiyot universitetiga nasib etdi. 2-o‘rinni Toshkent davlat yuridik universiteti, 3-o‘rinni esa O‘zbekiston xalqaro islomshunoslik akademiyasi egalladi.

🔹Voleybol bahslarida esa shohsupaga O‘zbekiston xalqaro islomshunoslik akademiyasi jamoasi ko‘tarildi.

Musobaqalar sog‘lom raqobat, do‘stlik va o‘zaro hurmat ruhida kechdi.

Ta’kidlash joizki, O‘zbekiston xalqaro islomshunoslik akademiyasida sportni rivojlantirishga alohida e’tibor qaratilmoqda. Akademiyada 10 ga yaqin sport to‘garaklari faoliyat yuritib, shanba kunlari akademiya rektori boshchiligida badantarbiya mashg‘ulotlari o‘tkazilishi an’anaga aylangan. Bundan tashqari, akademiya va bir qator sport federatsiyalari o‘rtasida hamkorlik memorandumlari imzolangan. “Hamkorlik kubogi” esa yangi o‘quv yili arafasida xodimlar o‘rtasida ko‘tarinki kayfiyat va do‘stona munosabatlar shakllanishiga zamin yaratdi.