GENERAL VA YOSHLAR UCHRASHUVI

Yangi O‘zbekistonda yosh avlodni barkamol inson sifatida tarbiyalash, mustaqil hayotga qadam qo‘yishlari uchun barcha sharoitlarni yaratish yo‘lida tizimli ishlar amalga oshirilmoqdaki, bu o‘z navbatida jonajon Vatanimizning har jihatdan salohiyatli, vatanparvar, fidoyi farzandlari safi yildan-yilga kengayishini ta’minlamoqda. 

Jumladan, kuni kecha Favqulodda vaziyatlar vazirligi akademiyasida yoshlarni vatanparvarlik va ona yurtga muhabbat va sadoqat ruhida tarbiyalash hamda ustozlar hayot maktabini yanada chuqurroq bilish va o‘rganish maqsadida “General va yoshlar uchrashuvi” tashkil etildi.

Mazkur uchrashuvda Favqulodda vaziyatlar vazirligi faxriylari general-polkovnik Qobul Berdiyev va general-mayor Ravshan Xaydarov, O‘zbekiston Respublikasi Prokuraturasi Faxriylarini ijtimoiy qo‘llab quvvatlash jamoatchilik markazi raisi 3-darajali Davlat adliya maslahatchisi Botir Kalonov, O‘zbekiston Respublikasi Huquqni muhofaza qilish akademiyasi kafedra boshlig‘I 3-darajali Davlat adliya maslahatchisi Shuxrat Uzakov, O‘zbekiston Respublikasi Huquqni muhofaza qilish akademiyasi professorlari 3-darajali Davlat adliya maslahatchilari Baxtiyor Po‘latov va Faxri Raximov, Akademiya professor-o‘qituvchilari, harbiy xizmatchilari va kursantlar hamda OAV vakillari ishtirok etdi. 

Tadbirni Akademiya boshlig‘i yuridik fanlari doktori, professor, polkovnik  Muzaffar Mamasiddiqov ochib, harbiy sohada uzoq yillar xizmat qilgan yoshi ulug‘ ustoz generallarni hayoti va mehnat faoliyati davomida to‘plagan boy tajribasi, yoshlik davridagi o‘ziga xos qiyinchiliklari, mehnat pallasidagi mashaqqatlari haqida samimiy fikrlarini bildirdi.

Shuningdek, polkovnik Muzaffar Mamasiddiqov mamlakatimizda yoshlarning iqtidorlarini namoyon etish va har tomonlama qo‘llab-quvvatlash borasida amalga oshirilayotgan ishlar, harbiy kasbning nufuzi va mas’uliyati xususida so‘z yuritdi.

Shundan so‘ng, so‘z olganlar, yoshlar bilan bo‘ladigan har qanday uchrashuv va jonli muloqotlardan cheksiz kuch-quvvat va ko‘tarinki ruh olishlarini, yoshlarning dilidagi maqsad va niyatlaridan xabardor bo‘lishlarini, ularni kelgusida xizmat vazifalarini mardonavor ado etgan holda, yuksak marralarga erishishlari uchun ana shunday uchrashuvlar juda zarur ekanligini alohida ta’kidladilar.

Shuningdek, mazkur tadbirda o‘zaro suhbat va muloqotlarda mamlakatimizda inson omiliga yuksak e’tibor berilayotgani, davlatimiz rahbari tashabbusi bilan jamiyatimizning har bir a’zosiga, ayniqsa yoshlarga g‘amxo‘rlik, mehr-oqibat ko‘rsatilayotgani, inson qadr-qimmati, uning orzu-niyatlarini ro‘yobga chiqarishga imkoniyat yaratib berish ustuvor vazifaga aylangani, yoshlarimiz, bugungi kunda yaratib berilayotgan ulkan shart-sharoitlardan unumli foydalangan holda, jonajon Vatanimiz ravnaqiga munosib hissa qo‘shib, kelajakda o‘z sohasining yetuk mutaxasislari bo‘lishlarini  bot-bot ta’kidlandi.

Uchrashuv doirasida ustoz general-polkovnik Qobul Berdiyevni qutlug‘ 70 yoshli yubileylari munosabati bilan Mudofaa vaziri hamda Akademiya rahbariyatining tabriklari va esdalik sovg‘alari ham tantanali topshirildi.

— Ustozlar, o‘z tajribalaridan so‘zlab bergan hayotiy saboqlar, chunonchi, qalblarida jo‘sh urgan vatanparvarlik tuyg‘usi har qanday mashaqqatli vaziyatda ularga kuch va shijoat bergani, xalqimiz oldidagi farzandlik burchi esa doimo o‘z vazifalariga fidoyilik va mas’uliyat bilan yondashishga undagani ishtirokchilar, ayniqsa, yoshlardagi Vatanga bo‘lgan muhabbat va sadoqat hissini yanada to‘lqinlantirib yubordi desam mubolag‘a bo‘lmaydi deydi — kapitan Firdavs Karimov. 

Shuni alohida ta’kidlash joizki, muloqotlar ochiq, samimiy va savol-javoblarga boy bo‘ldi, inson qadri ulug‘lanayotgan yurtda bunday uchrashuvlar yoshlarni tafakkur qilishga, yurt istiqboli uchun mas’uliyatli bo‘lishga undaydi.

Uchrashuv yakunida generallar Akademiyaning “Faxriy mehmonlar kitobi”ga o‘zlarininig ezgu niyatlari, o‘gitlari va dastxatlarini esdalik sifatida yozib qoldirdilar.

Farhodjon XOJAYEV,

FVV Akademiyasi

 katta o‘qituvchisi, mayor.