OTMlarda talabalarni turar joy bilan ta’minlash imkoniyatlari kengaytirilmoqda

Jarayon

15:50 / 22.08.2026 130

Yangi o‘quv yili arafasida talabalarni turar joy bilan ta’minlash, mavjud TTJlardagi sharoitlarni yaxshilash, xavfsiz hamda qulay yashash muhitini yaratish masalalari ko‘rib chiqilmoqda. Shu munosabat bilan Toshkent davlat iqtisodiyot universiteti hamda O‘zbekiston davlat jahon tillari universitetida talabalar uchun yaratilgan sharoitlar va yangi o‘quv yiliga tayyorgarlik jarayonlariga bag‘ishlangan press-tur o‘tkazildi.

Jarayonda jurnalistlar, bloger va ommaviy axborot vositalari vakillari ikki oliy ta’lim muassasasida talabalarni turar joy bilan ta’minlash bo‘yicha amalga oshirilayotgan ishlar bilan yaqindan tanishdi. Xususan, talabalar turar joylaridagi sharoitlar, joylashtirish jarayonlari, ijara xonadonlari bilan ishlash amaliyoti hamda yangi infratuzilma obyektlarini barpo etish bo‘yicha loyihalar ko‘zdan kechirildi.

Jarayonni O‘zDJTU misolida ko‘rib chiqadigan bo‘lsak, mazkur OTM joriy yil abituriyentlar eng ko‘p tanlagan uch OTMdan biri bo‘lib, bu yerda yangi o‘quv yilida yashash uchun jami 13 898 ta o‘rin tayyorlangan. Shundan 3 441 ta o‘rin universitet tasarrufidagi 7 ta talabalar turar joyida, 10 457 ta o‘rin esa 1 630 ta ijara xonadonida tashkil etilgan.

Shuningdek, kelgusidagi ehtiyojlarni hisobga olingan holda yangi TTJ ham barpo etilmoqda. Davlat-xususiy sheriklik asosida qurilayotgan mazkur obyekt 9 qavatli bo‘lib, 1 100 talabaga mo‘ljallangani, qurilish ishlari 2025-yil 18-martda boshlangan bo‘lib, loyihaning umumiy qiymati 80,8 milliard so‘m, shundan 45,8 milliard so‘mi xususiy tashabbuskor, 35 milliard so‘mi davlat budjeti mablag‘lari hisobidan moliyalashtirilgani ma’lum qilindi.

Yangi o‘quv yili oldidan amalga oshirilayotgan mazkur ishlarning bosh maqsadi esa bitta – talabaning o‘qishi, yashashi va rivojlanishi uchun munosib sharoit yaratish.