Ta’lim forumi bo‘lib o‘tdi

Bugun Abdulla Avloniy nomidagi pedagogik mahorat milliy institutida Maktabgacha va maktab taʼlimi vazirligi hamda Iqtisodiy hamkorlik va taraqqiyot tashkiloti (OECD) hamkorligida Taʼlim forumi bo‘lib o‘tdi. Unda O‘zbekiston Respublikasi Prezidenti Administratsiyasi rahbarining ta’limni isloh qilish bo‘yicha o‘rinbosari bo‘linmasining loyiha koordinatori Yuliya Risyukova, Maktabgacha va maktab ta’limi vaziri E’zoza Karimova, xorijiy hamkor tashkilot vakillari va mas’ullar ishtirok etishdi.

Forum davomida “PISA–2025: Xalqaro baholash dasturi natijalari” o‘rganilib, O‘zbekistonning tabiiy-ilmiy, hududiy, ijtimoiy va maktablar kesimidagi tafovutlar, ta’limdagi tenglik va imkoniyatlar, o‘qituvchi ko‘magi, o‘quv muhiti va maktab boshqaruvi bilan bog‘liq omillar yuzasidan tahliliy ma’lumotlar taqdim etildi. Shuningdek, Forumda PISA–2025 global manzarasi va natijalarni talqin qilish, O‘zbekistonning asosiy milliy natijalari, PISA–2022–2025 dinamikasi, tenglik va mazmun omillari bo‘yicha taqdimotlar hamda “Natijalardan amaliy harakatlarga” mavzusida yuqori darajadagi panel muhokamasi tashkil etildi.

O‘zbekiston PISA xalqaro tadqiqotida ilk bor 2022-yilda ishtirok etdi. Mazkur ishtirok orqali mamlakatimiz o‘quvchilarning bilim va ko‘nikmalari ilk marotaba keng xalqaro qiyosiy mezonlar asosida baholandi. O‘zbekistonning PISA–2025 tadqiqotida ikkinchi marotaba ishtirok etishi esa ta’lim tizimida o‘tgan davr mobaynida amalga oshirilgan islohotlar va o‘zgarishlar dinamikasini kuzatish, natijalarni qiyoslash hamda keyingi ustuvor vazifalarni belgilash imkonini beradi.

PISA–2025 tadqiqotida 91 ta mamlakatdan 760 mingdan ortiq 15 yoshli o‘quvchi ishtirok etdi. Jumladan, 2025-yil aprel–may oylarida O‘zbekistonda PISA–2025 xalqaro tadqiqotining asosiy bosqichi o‘tkazildi. Xalqaro tanlanma asosida mamlakatimizning 233 ta maktabidan 8652 nafar 15 yoshli o‘quvchi tadqiqotda qatnashdi.

PISA–2025 siklida tabiiy-ilmiy savodxonlik asosiy yo‘nalish sifatida, matematika va o‘qish savodxonligi esa qo‘shimcha yo‘nalishlar sifatida baholandi. Shu bilan birga, mazkur siklda o‘quvchilarning raqamli vositalardan foydalangan holda bilim olishi, ma’lumotlarni tahlil qilishi va muammolarni hal qilish qobiliyatlarini o‘rganuvchi “Raqamli dunyoda o‘rganish” innovatsion yo‘nalishi ham kiritildi.

Ta’kidlash lozimki, xalqaro tadqiqotlarda ishtirok etishdan ko‘zlangan asosiy maqsad mamlakatlarning faqat reytingdagi o‘rnini aniqlash emas. Eng avvalo, bu orqali ta’lim tizimining mavjud holatini xolis baholash, natijalarni xalqaro miqyosda qiyoslash, yutuqlar bilan bir qatorda rivojlantirilishi zarur bo‘lgan yo‘nalishlarni aniqlash va kelgusi yillar uchun dalillarga asoslangan strategik qarorlar qabul qilish ko‘zda tutiladi.

Mazkur forum yakunlari PISA–2025 natijalari bo‘yicha milliy hisobotni tayyorlash, hududlarda professional muloqot va seminarlarni tashkil etish, natijalarni maktablar darajasida muhokama qilish hamda aniqlangan ustuvor yo‘nalishlar bo‘yicha tegishli choralarni belgilash uchun muhim asos bo‘lib xizmat qiladi. Shu bilan birga, O‘zbekistonning navbatdagi PISA–2029 xalqaro tadqiqotiga tayyorgarligi bo‘yicha ustuvor vazifalar va keyingi qadamlarni belgilash ko‘zda tutilgan.