Yangi o‘quv yiliga tayyorgarlik: “Prezident sovg‘alari” hududlarga yetkazilmoqda

Jarayon

15:39 / 05.08.2026 29

Bugun Maktabgacha va maktab ta’limi vazirligi tomonidan yangi 2026–2027-o‘quv yiliga tayyorgarlik hamda 1-sinf o‘quvchilariga topshiriladigan “Prezident sovg‘alari”ni hududlarga yetkazish jarayonlariga bag‘ishlangan press-tur tashkil etildi.

Tadbir avvalida OAV vakillari ishtirokida vazirlik huzuridagi “Ta’minot va logistika xizmati” korxonasi tomonidan 1-sinf o‘quvchilari uchun tayyorlangan 12 nomdagi o‘quv qurollaridan iborat “Prezident sovg‘asi” karvoni hududlarga kuzatildi.

Shundan so‘ng jurnalistlar Chilonzor tumanidagi 202-umumta’lim maktabida yangi o‘quv yiliga tayyorgarlik, 1-sinf o‘quvchilarini qabul qilish uchun yaratilayotgan sharoitlar bilan tanishtirildi.

Ma’lum qilinishicha, 2026–2027-o‘quv yilida mamlakatimizdagi 10 ming 225 ta umumta’lim maktabida 550 mingdan ortiq pedagog 6,7 milliondan ziyod o‘quvchiga ta’lim beradi. Joriy o‘quv yilida 795 mingdan ortiq bolaning 1-sinfga qabul qilinishi rejalashtirilgan bo‘lib, 5-avgust holatiga ko‘ra 680 ming nafar bola maktablarga qabul qilingan. Bu rejaning 85 foizini tashkil etadi.

1-sinf o‘quvchilari uchun tayyorlangan “Prezident sovg‘asi” tarkibiga o‘quv sumkasi, daftarlar, ruchka, oddiy va rangli qalamlar, rangli qog‘oz, plastilin, rasm daftari, o‘chirg‘ich, akvarel bo‘yoqlari, yelim hamda qalamdon kabi 12 turdagi o‘quv qurollari kiritilgan.

Qayd etilishicha, mazkur o‘quv qurollari 15-avgustga qadar barcha hududlarga, 25-avgustga qadar esa maktablarga qabul qilingan o‘quvchilar soniga mos ravishda to‘liq yetkaziladi. Sovg‘alar an’anaviy “Birinchi qo‘ng‘iroq” tadbirlaridan so‘ng 1-sinf o‘quvchilariga tantanali ravishda topshiriladi.

Shuningdek, vazirlikning adm.maktab.uz elektron platformasi orqali 1-sinfga qabul qilingan barcha bolalarning ro‘yxati maktablar kesimida shakllantirilgani, bunda nodavlat hamda boshqa vazirlik va idoralar tasarrufidagi ta’lim muassasalari o‘quvchilari ham inobatga olingani ma’lum qilindi.

Press-tur doirasida yangi avlod darsliklari taqdimoti ham o‘tkazilib, mutaxassislar ularning mazmuni va o‘ziga xos jihatlari haqida batafsil ma’lumot berdi.

Tadbir o‘tkazilgan Chilonzor tumanidagi 202-umumta’lim maktabida yangi o‘quv yilida 1260 nafardan ortiq o‘quvchi ta’lim olishi, ulardan 175 nafari 1-sinfga qabul qilinishi rejalashtirilgan. Maktabda alohida ta’lim ehtiyojiga ega bolalar uchun inklyuziv sinflar faoliyat yuritib, zarur shart-sharoitlar yaratilgan. Hozirda mazkur sinflarda 13 nafar o‘quvchi, jumladan, joriy yilda qabul qilingan 2 nafar birinchi sinf o‘quvchisi tahsil olmoqda.

Press-tur davomida Vazirlik mutaxassislari jurnalistlar tomonidan berilgan savollarga ham batafsil javob berib o‘tishdi. Jumladan, aksariyat jurnalistlarda maktab darsliklarining sifati va texnik me’yorlarga qanchalik e’tibor qaratilganligi bilan bog‘liq savollar qiziqtirdi.

– Har bir darslik Vazirlar Mahkamasining 726-sonli qarori bilan tasdiqlangan texnik reglament asosida chiqarilgan, – deydi Maktabgacha va maktab ta’limi vazirligining Oʻquv jarayonini metodik jihatdan taʼminlash va darsliklar boshqarmasi boshlig‘i Qahramon Almardanov. – Boshlang‘ich sinflarning darsliklari 420 gr dan oshmasligi belgilangan. Har yili vazirlik qoshida ishchi guruh tuziladi va bu ishchi guruh reglament bo‘yicha me’yorlarga amal qilinayotganini tekshirib boradi. 1-sinflarda 16 nomdagi darslik va 8 nomdagi mashq daftarlarining har birining masshtab talablari va og‘irlik me’yorlari ko‘rib chiqilgan. Dars jadvali bo‘yicha ham kitoblar soni va ularning og‘irligi darajasi tekshirib chiqiladi va bir kungi darsliklar miqdori tahminan 1.5 kg dan oshmaydi.

Bilamizki, 2–4-sinf darsliklari har 3 yilda yangilanadi. Mana bu yil 2, 3, 4-sinflar darsliklari ham yangi formatda o‘quvchilarimiz qo‘liga yetib boradi, – deydi Qahramon Almardanov. – Alohida yangilik sifatida aytishimiz mumkinki, joriy yili 4-sinfdan boshlab informatika darslari ham o‘quv dasturlariga kiritildi. Bu fandan ham zamonaviy va kreativ darsliklar chop etildi. Prezidentimiz tashabbusi bilan Sharqiy Xitoy pedagogika universitetining sun’iy intellekt bo‘yicha 7 nomdagi o‘quv qo‘llanmalari o‘zbek tiliga tarjima qilinib, nashr qilinmoqda. Yangi o‘quv yili uchun ushbu o‘quv qo‘llanmalar ham barcha umumta’lim maktablariga yetkaziladi. Bu qo‘llanmalar darsdan tashqari mashg‘ulotlar sifatida informatika fani o‘qituvchilari tomonidan o‘qitiladi.