Xitoylik olimlar Yerning past orbitasidan inson yuzlarini aniqlay oladigan dunyodagi eng kuchli josus kamerasini yaratdilar.

Xitoy fanlar akademiyasiga qarashli Kosmik axborot tadqiqot instituti tomonidan ishlab chiqilgan texnologiya 100 kilometr uzoqlikdan millimetr darajasida aniqlik berib, global kuzatuv standartlarini o‘zgartirishi mumkin.

South China Morning Post nashrining xabariga ko‘ra, ushbu yangi optik tasvirlash texnologiyasi Pekin hukumatiga xorijiy harbiy sun’iy yo‘ldoshlar va yer yuzidagi mudofaa obyektlarini ilgari ko‘rilmagan darajadagi aniqlik bilan kuzatish imkonini beradi.

Hozirgi josus kameralaridan 100 barobar kuchliroq

Lazerli tasvirlash tizimi oddiy linzalarga asoslangan mavjud josus kameralaridan 100 barobar yuqori aniqlikka erishdi. 2011-yilda AQSHning Lockheed Martin kompaniyasi tomonidan o‘tkazilgan sinovda 1,6 kilometr masofadan 2 santimetr aniqlikdagi tasvir olinishi mumkinligi isbotlangan edi.

Yangi Xitoy kamerasining Qinghai ko‘li ustida 101,8 kilometr uzoqlikda o‘tkazilgan sinovida esa ko‘lning qarama-qarshi tomonidan atigi 1,7 millimetr hajmdagi mayda detallar ham aniq ko‘rinib turgan.

Sun’iy yo‘ldosh tasvirlash texnologiyasida yangi bosqich

Yerning past orbitasidagi sun’iy yo‘ldoshlar odatda 170 kilometr va undan yuqori balandliklarda ishlaydi, ba’zilari esa 800 kilometrgacha chiqishi mumkin. Biroq olimlarning ta’kidlashicha, sinov ideal ob-havo sharoitida amalga oshirilgan va yomon ob-havo yoki hatto yengil bulut qatlami kameraning aniqligiga ta’sir qilishi mumkin.

Xitoy tadqiqotchilari tomonidan ishlab chiqilgan ushbu josus kamera haqida Chinese Journal of Lasers jurnalida "Sun’iy ochiqlikli lidar birinchi marta 100 kilometr masofadan millimetr darajasida tasvir olishga erishdi" nomli ilmiy maqola chop etildi.

Shu bilan birga, AQSHning Albedo Space sun’iy yo‘ldosh tasvirlash kompaniyasi ham yer yuzidagi odamlarni kattalashtirib tasvirga olish imkonini beradigan texnologiya ustida ish olib bormoqda.

Biroq kompaniya asoschilari ularning tizimi yuzni tanish xususiyatiga ega bo‘lmasligini ta’kidlamoqda. AQSH hukumati bilan bir qator mudofaa shartnomalarini imzolagan bu kompaniya maxfiylik himoyachilarining tanqidlariga ham uchramoqda.