“Yurakdan yurakka” ko‘chgan o‘zbekona tuyg‘ular

Germaniyada tashkil etilgan “O‘zbegoyim Women Community” vatandosh ayollar klubi tuzilganiga hech qancha bo‘lmay, bir nechta yirik tadbirlar o‘tkazishga, o‘z a’zolari safini kengaytirishga ulgurdi.

Kuni kecha Germaniyaning Berlin shahrida tashkil etilgan navbatdagi “Yurakdan yurakka” nomli  tabdirda, Germaniyaning turli shaharlaridan kelgan ellikka yaqin o‘zbek ayollari jam bo‘lishdi.

Yevropaning qoq markazida o‘zbek zabonida yangragan she’r va qo‘shiqlar, seminar-treninglar olmon diyorida o‘zgacha sharqona muhitni bunyod etdi go‘yo.  Ilm olish, tajriba orttirish maqsadida kelgan, yirik oliygohlarda tahsil olayotgan, qolaversa qisqa muddatda Yevropada o‘z kasbiy karerasini bunyod etib ulgurgan opa-singillarimiz, bir-birlari bilan tajriba almashibgina qolmay, dildan samimimiy o‘zbekona gurunglashishdi. Psixolog Shohida Xoliqova, ijtimoiy pedagog Feruza Mamadaliyevalar o‘z chiqishlari bilan  yevropa muhitida milliy qadriyatlarimizga asoslangan tabiya metodlari haqida saboq berishgan bo‘lsa, jurnalist va shoira Ma’rifat Nurning vatan sog‘inchi haqida ijro etgan she’ri, kipriklarga yosh qalqitdi:

Men bir shoir qizi, yot elga o‘gay, 

Bag‘rida o‘stirgan, uchirgan ham u. 

Qancha baxtli bo‘lmay, qancha shod bo‘lmay, 

Vatan  ̶  ko‘ksimdagi pinhona qayg‘u. 

Tadbir o‘zbek milliy taomlari, o‘zbek oshi ustidagi shirin davra suhbatlarga ulanib ketdi.

Ma’rifat NURMATOVA, 

“O‘zbegoyim Women Community” PR targ‘ibotchisi

Hamburg, Germaniya