FVV Akademiyasi bo‘ylab press-tur

Oramizda shunday kasb egalari borki, ularning ko‘magida fuqarolarimizning hayoti, sog‘ligi va moddiy boyliklari saqlab qolinadi. Buning uchun o‘zlarining shirin jonini vaqti kelsa, xavf-xatarga qo‘yadilar. Anglaganingizdek, bu sharafli va mas’uliyatli – qutqaruvchilik kasbidir. Mazkur sohaga yetuk ofitser-kadrlar tayyorlovchi tayanch oliy ta’lim muassasasi, Favqulodda vaziyatlar vazirligi Akademiyasi hisoblanadi. Ta’lim dargohining asosiy maqsadi – yangicha fikrlaydigan, zamonaviy hamda o‘z kasbining yetuk mutaxassislarini tayyorlashdan iborat. 

Favqulodda vaziyatlar vazirligi akademiyasida “27-iyun — Matbuot va ommaviy axborot vositalari xodimlari kuni” munosabati bilan 20 nafardan ortiq OAV vakillari, Maxsus vazifalar bo‘yicha Respublika qutqaruv markazi, yong‘in xavfsizligi va favqulodda vaziyatlar muammolari ilmiy-tadqiqot instituti, Fuqaro muhofazasi instituti, Toshkent shahar favqulodda vaziyatlar boshqarmasi harbiy xizmatchilari, Akademiya professor-o‘qituvchilari, harbiy xizmatchilari, kursantlar, universitet va institut olimlari, talabalar-yoshlar ishtirokida press-tur tashkil etildi. 

Press-turni Akademiya boshlig‘i, yuridik fanlari doktori, professor, polkovnik Muzaffarjon Mamasiddiqov ochib, bugungi shiddatli va murakkab davr media soha xodimlaridan yanada fidoyi va mas’uliyatli bo‘lib, Vatanga, xalqqa sadoqat bilan xizmat qilishni, yuksak professional mahoratni, qat’iyatni, milliy manfaatlarimizning chin ma’nodagi himoyachisi bo‘lishni, mavzuga teran tahliliy, ijodiy asosda yondashishni talab etilayotgani xususida fikrlarini bildirib o‘tdi.

Mazkur press-tur doirasida Akademiyaning qisqacha faoliyati xususan, master-klass, yoshlar bilan ochiq miloqot, davra suhbatlari, shuningdek, turli favqulodda vaziyatlarda to‘g‘ri harakatlanish qoidalari, sohaga oid viktorinalar, yong‘in-qutqaruv otryadlarining jangovar yoyilishi namoyishlari, Akademiya kursantlarinining sportning “Qo‘l jangi” turi bo‘yicha chiqishlari, “Shaxmat” musobaqalari, Favqulodda vaziyatlar vazirligi tizimida foydalaniladigan yong‘in va avariya-qutqaruv zamonaviy texnikalari, texnik vositalar, asbob-anjomlarining ko‘rgazmali namoyishlari yuqori saviyada tashkillashtirildi.

Press-turning badiiy qismida esa Akademiya Orkestr jamoasining bayramona konsert dasturi, iqtidorli kursantlarning sahna ko‘rinishlari va kuy-qo‘shiqlari yig‘ilganlarga bayramona kayfiyat bag‘ishladi.

Nazokat XOLMETOVA,

"Ma'rifat" muxbiri