Tan olish kerak, yurtimizda Xalqaro kitob kuni nomi bilan mashhur bo‘lgan bu bayram BMTga a’zo barcha davlatlar kabi tantanavor nishonlanmaydi. Biroq siz olamni o‘zgartirish qobiliyatiga egasiz. Bu degani, Xalqaro kitob kunini kitoblar olamiga sayr etib, badiiy asarlar mutolaa qilib, o‘rganganlaringizni o‘rtoqlari­ngiz bilan bo‘lishib, ularni ham bilimlar olamiga yetaklash iqtidori mavjud sizda. To‘g‘ri, gap bilan bu maslahatni umumiy aytish oson. Lekin biz bu kunni zavqli va foydali o‘tkazishingiz uchun kun tartibingizda qiladigan ishlaringiz ro‘yxatini tuzib chiqdik:

•      Siz yashayotgan hududda kutubxonalar bor. Mutolaa qilish uchun esa o‘rindiqlar bisyor. Demak, kitobxon do‘stlaringizni chaqirasizda, ilmlar koshonasi tomon oshiqasiz.

•      Quruq qo‘l bilan borish yaxshi emas, albatta. O‘zingiz bilan birga eng sevimli kitobingizni oling. Uni kutubxona, maktab yoki xayriya tashkilotlariga sovg‘a qiling. Bu kitobdan olgan taassurotlaringiz va quvonchingizni boshqalarga ulashishning ajoyib usuli.

•      Kutubxonaga borganingizdan so‘ng do‘stlari­ngiz bilan musobaqa uyushtiring. 2-3 soat vaqt davo­mida necha bet kitob o‘qib, qancha bilim orttirganingiz borasida bellashing.

•      Uyga qaytishda kitob do‘koniga kirib o‘tishni esdan chiqarmang. Axir, hadya qilgan kitobingiz o‘rnini yangisi bilan to‘ldirish kerak.

•      Do‘stlaringizni uyingizda mehmon qiling. O‘zaro “Kitobxonlik klubi” tashkil etib, javoningizdagi badiiy xazinadan birgalikda mutolaa qiling. Adabi­yotga bo‘lgan muhabbatingizni boshqalar bilan baham ko‘ring.

•      Onlayn adabiy tadbirlarda ishtirok eting. Ayni kunlarda bolalar adabiyoti yo‘nalishida ijod qilayotgan shoir va yozuvchilar bilim va ko‘nikmalarini ulashishdan horishmayapti. Siz ham bu jarayonda faol bo‘ling!

•      Mobil qurilmadan to‘g‘ri foydalanishga odatlaning. Vaqtingizni havoga sovurmang. Kino, multfilm va klip ko‘rguncha bepul elektron kitoblarni yuklab
oling.

•      Badiiy xazina mutolaa qilishda foydali bo‘ladigan hunarmandchilik ishlari bilan shug‘ullaning. Masalan, xatcho‘p, lavh yasashga harakat qilib ko‘ring. Qo‘lingizdan kelishiga amin bo‘lmasangiz, bu ishga otangiz yoki buvangizni chorlang. Ishonchim komilki, ular ham bu ishdan zavq oladi.

Xullas, endi Xalqaro kitob kunidagi rejalaringizdan xabardorsiz. O‘ylaymizki, tavsiyalarimizni risoladagidek bajarsangiz, xorijlik tengdoshlaringiz sizga havas qilsa arziydi.

Azim AXTAMOV