Ulkan marralarga boshla, qo‘ng‘iroq!

Mana maktabimizda yana qo‘ng‘iroq ovozi! Bugungi qo‘ng‘iroq har galgidan jo‘shqinroq chalingandek go‘yo. Birinchi sinfga ilk qadamlarini qo‘ygan bolajonlarimizning quvonchi cheksiz. Farg‘ona viloyatining olis chegara hududi bo‘lmish Beshariq tumani Uzun qishlog‘iga qarashli 11-maktabda katta tantana.

“Vatan uchun, millat uchun, xalq uchun!” shiori ostida boshlangan birinchi qo‘ng‘iroq tadbirimizga viloyat hokimi Rasuljon Jo‘rayev tashrif buyurdi. Viloyat hokimi ko‘zida quvonch, kelajakka katta ishonch bilan boqib turgan yosh avlodga o‘zining tabrik so‘zlarini izhor qildi. Kelajak yoshlariga davlatimizning  yaratayotgan imkoniyatlari, ta’lim sohasidagi islohotlar, erishilgan yutuqlari haqida to‘lqinlanib gapirdi. Barcha yoshlarni katta-katta maqsadlar sari ilhomlantirdi, izlanishga, cho‘qqilarni zabt etishga da’vat etdi. Shundan so‘ng maktabimizning sobiq o‘quvchilari, faxriylari, mahalla faollari so‘zga chiqib, barcha ustozlar va ta’lim oluvchilarni yangi boshlangan o‘quv yili bilan qutladilar.

Tadbir qatnashchilariga o‘quvchilar tomonidan tayyorlangan kuy-qo‘shiqlar taqdim etildi va barcha maktab jamoasi va o‘quvchilarni shijoat bilan o‘quv yilini boshlashga ruhlantirishdi.

Hokimimiz Rasuljon Jo‘rayev Muhtaram Prezidentimizning birinchi sinflar uchun sovg‘alarini tantanali ravishda taqdim etdi. Birinchi sinf o‘quvchilari ko‘tarinki kayfiyatda, katta mamnuniyat bilan o‘quv qurollari jamlanmalarini qabul qilib olishdi. Bugungi ilk o‘qish kuni barcha o‘qituvchi va o‘quvchilar hamda ota-onalarga unitilmas quvonch va g‘urur baxsh etdi, desak adashmagan bo‘lamiz.

 Nilufar SAIDOVA,

Beshariq tumanidagi 11- maktabning oliy toifali boshlangʻich sinf oʻqituvchisi