Ilgʻor pedagoglar hamda iqtidorli oʻquvchilarga dam olish maskanlariga bepul yoʻllanma beriladi

✅ Vazirlar Mahkamasining 2025-yil 29-iyuldagi tegishli qarori bilan “Maktabgacha va maktab taʼlimi vazirligi tizimidagi dam olish maskanlariga dam oluvchilarni qabul qilish tartibi toʻgʻrisida”gi Nizom tasdiqlandi.  

✅ Unga koʻra, vazirlik tizimidagi dam olish maskanlariga vazirlik tizimi xodimlari, jumladan, pedagog kadrlar hamda davlat umumiy oʻrta taʼlim tashkilotlarining (7-14 yosh) iqtidorli oʻquvchilarini qabul qilish tartibi belgilandi.

👉 Dam olish maskanlarida:

➖ vazirlik tizimi xodimlari hamda ilgʻor pedagoglar uchun — sentabr-may oylarida;

➖ iqtidorli oʻquvchilar uchun — iyun-avgust oylarida 12 kunlik dam olish kunlari belgilanadi.

📍 Yoʻllanmalar saralash mezonlari asosida taqsimlanadi hamda eng yuqori natijalarga erishgan vazirlik tizimi xodimlari, pedagog kadrlar hamda iqtidorli oʻquvchilarga ketma-ketlik asosida bepul yo’llanma beriladi.

👉 Maskanlarda dam oluvchi ilgʻor pedagoglar quyidagi mezonlar asosida tanlab olinadi:

➖ xalqaro olimpiadalar gʻoliblarini tayyorlagan oʻqituvchilar;

➖ oʻqituvchi boʻlib faoliyat yuritayotgan xalqaro olimpiadalar gʻoliblari;

➖ xorijiy til va STEAM fanlaridan mutaxassisligi boʻyicha xalqaro sertifikatlarga ega oʻqituvchilar (TESOL Level 5, SEFR B2, IELTS 6 va undan yuqori, shuningdek, vazirlik tomonidan belgilanadigan boshqa sertifikatlar);

➖ asosiy olimpiadalarning respublika bosqichi gʻoliblarini tayyorlagan oʻqituvchilar;

➖ respublika bosqichidagi koʻrik-tanlovlarda faxrli oʻrinlarga ega boʻlgan oʻqituvchilar;

➖ oliy va birinchi malaka toifasiga ega boshlangʻich sinf oʻqituvchilari, maktabgacha taʼlim tashkilotlari pedagoglari;

➖ asosiy olimpiadalarning viloyat bosqichi gʻoliblarini tayyorlagan oʻqituvchilar.

👉 Maskanlarda dam oluvchi iqtidorli oʻquvchilar (7-14 yosh) quyidagi mezonlar asosida tanlab olinadi:

➖ asosiy olimpiadaning uchinchi va toʻrtinchi bosqichlarida fanlar kesimida 1-, 2-, 3-oʻrinlarni egallagan oʻquvchilar;

➖ mintaqaviy xalqaro olimpiadalar gʻoliblari;

➖ nufuzli xalqaro olimpiadalarda ishtirok etgan oʻquvchilar;

➖ xalqaro tanlov, festival va musobaqa gʻoliblari;

➖ respublika darajasidagi tashkilotlar tomonidan tashkil etilgan turli koʻrik-tanlovlar va musobaqalarning respublika bosqichi gʻoliblari.

👉 Dam olish maskanlarida:

➖ maʼnaviy-maʼrifiy, koʻngilochar, sogʻlomlashtirish, sport, oʻquv va ilmiy-tadqiqot yoʻnalishlarida;

➖ iqtidorli oʻquvchilarning turizm, sport, texnika, kitobxonlik, madaniyat va sanʼat yoʻnalishlaridagi qobiliyatlarini rivojlantirish maqsadida turli xil tadbirlar tashkil etiladi.