Xususiy maktab va bog’chalarga ham bir yillik maktabga tayyorlov guruhlari ochishga ruxsat beriladi

Xususiy maktab va bogʻchalarga ham bir yillik maktabga tayyorlov guruhlari ochishga ruxsat beriladi

Shavkat Mirziyoyev kecha, 4-fevral kuni bu boʻyicha takliflar taqdimoti bilan tanishdi. 

Unga koʻra, quyidagilar rejalashtirilmoqda:

➖ Maktabgacha taʼlim tizimida oʻyinga asoslangan taʼlim modeli joriy etilib, bolaning tabiiy qobiliyati va qiziqishlarini hisobga olgan holda taʼlim-tarbiya jarayoni tashkil qilinadi;

➖ 2026-2028-yillarda har bir hududda 120 oʻrinli “Yangi avlod” davlat bogʻchalari hamda ularning tarkibida Bolalarni rivojlantirish innovatsion markazlari tashkil etiladi. Mazkur bogʻchalarda qoʻshimcha rahbar hamda tarbiyachi-yoʻriqchi shtatlari joriy qilinib, rahbar va pedagog xodimlarga 20 foiz miqdorida har oylik ustama toʻlanadi;

➖ Amalda ishlab kelayotgan oʻrta maxsus maʼlumotli pedagog kadrlar uchun dual taʼlim (“5+1”) asosida bakalavrlar tayyorlash tizimi joriy etiladi;

➖ 2027/2028-oʻquv yilidan boshlab maktabga tayyorlov guruhlarida oʻqigan bolalarga davlat namunasidagi elektron sertifikat beriladi, mazkur maʼlumotlar umumiy oʻrta taʼlim toʻgʻrisidagi shahodatnomada qayd etiladi;

➖ Maktabgacha ta’limda qamrov darajasi 80 foizdan past boʻlgan tuman va shaharlarda (Toshkent shahri bundan mustasno) tadbirkorlar uchun quyidagi imtiyozlar beriladi:

🔹 maktab va bogʻchalar hududidagi boʻsh yer maydonlarida davlat-xususiy sheriklik asosida bogʻchalar tashkil etilganda, ijara toʻlovlari 30 yilgacha undirilmaydi;

🔹 har bir tarbiyalanuvchi uchun davlat bogʻchalarida bir bolaga toʻgʻri keladigan xarajatning 50 foizi miqdorida subsidiya ajratiladi;

🔹 ushbu tartib 2024-yildan tashkil etilgan nodavlat bogʻchalarga ham tatbiq etiladi;

🔹 qamrov darajasi past hududlarda bogʻcha va maktabdan tashqari joylarda quvvati kamida 150 oʻrinli nodavlat bogʻchalar tashkil etilsa, 7 yilgacha muddatga 5 milliard soʻmgacha imtiyozli kreditlar ajratiladi;

🔹 tarbiyachilarga oylik ish haqi toʻlash xarajatlari davlat bogʻchalarida belgilangan meʼyorlar asosida uch yil davomida qoplab beriladi. Har 30 nafar bolaga bir nafar tarbiyachi shtati hisoblanadi.

🔹 mazkur imtiyozlar yangi koʻp kvartirali uylarning birinchi qavatida tashkil etiladigan xususiy bogʻchalarga ham tatbiq etiladi;

🔹 bundan tashqari, 2030-yil 1-yanvarga qadar quvvati 150 oʻrindan kam boʻlmagan nodavlat bogʻchalar tashkil etgan tadbirkorlar uchun ijtimoiy soliq stavkasi boʻyicha yengilliklar beriladi.