Islom – salomatlik targ‘ibotchisi

Jarayon

16:30 / 26.05.2025 1.33k

Ma’lumki, yurtimizda yoshlar masalasi davlat siyosatining ustuvor yo‘nalishlaridan biri sifatida belgilanib, kelajak egalariga har tomonlama qulay imkoniyatlar yaratish, ularni qo‘llab-quvvatlash, iqtidorini yuzaga chiqarishga ko‘maklashish borasida keng ko‘lamli islohotlar olib borilmoqda. Xuddi shu ma’noda O‘zbekiston xalqaro islomshunoslik akademiyasida “Sport – tinchlik elchisi” shiori ostida “Imom Moturidiy kubogi” sport musobaqalari hamda “Islom – salomatlik targ‘ibotchisi” mavzusida respublika ilmiy-amaliy konferensiyasi bo‘lib o‘tdi.

Mazkur tadbirlar O‘zbekiston Respublikasi Prezidentining 2025-yil 14-fevraldagi yoshlar bilan ochiq muloqoti doirasida bergan topshiriqlari, shuningdek, 2025-yil 21-apreldagi “Fuqarolarning vijdon erkinligi huquqi kafolatlarini yanada mustahkamlash hamda diniy-ma’rifiy sohadagi islohotlarni yangi bosqichga olib chiqish chora-tadbirlari to‘g‘risida”gi Farmoni hamda 2025-yil 14-martdagi “Imom Moturidiy tavalludining 1155 yilligini keng nishonlash to‘g‘risida”gi Qarori ijrosini ta’minlash maqsadida tashkil etildi.

Ta’kidlash joizki, bu turdagi festival yurtimizda ilk marotaba tashkil etildi. Jarayonda O‘zbekiston xalqaro islomshunoslik akademiyasi, Akademiya qoshidagi akademik litsey, Imom Buxoriy nomidagi Toshkent islom instituti, Mir Arab oliy madrasasi, Hadis ilmi maktabi hamda Imom Termiziy nomidagi Termiz islom instituti talabalari ishtirok etdi. Ular mini-futbol, voleybol, stol tennisi, shaxmat va shashka kabi sport turlari bo‘yicha bellashishdi. Shuningdek, jamoalar o‘rtasida milliy o‘yinlar – kurash, arqon tortish, tosh ko‘tarish kabi bahslar ham o‘tkazildi. “Islom – salomatlik targ‘ibotchisi” mavzusida o‘tkazilgan ilmiy-amaliy konferensiyada esa, yosh olimlar, mutaxassislar, doktorantlar, magistrantlar, xorijiy mamlakatlar OTMlari professor-o‘qituvchilari, O‘zbekiston xalqaro islomshunoslik akademiyasi, respublikadagi diniy ta’lim muassasalari va sohaga oid tashkilotlar mutaxassislari ma’ruzalari bilan ishtirok etishdi.

– Islomda ovqatlanishga faqat tanani to‘ydirish vositasi emas, balki ruhiy poklanish, sabr, shukr, iymon va sog‘lom yashash tamoyillariga sodiqlikning bir ko‘rinishi sifatida qaraladi, deydi nutqida Qo‘qon davlat universiteti “Pedagogika-psixologiya” kafedrasi dotsent vazifasini bajaruvchisi Gulruxon Ashurova. Islom ta’limotlariga ko‘ra, inson tanasiga kiradigan har bir luqma faqat jismoniy emas, balki ruhiy va axloqiy holatga ham bevosita ta’sir ko‘rsatadi. Sog‘lom turmush tarzi uchun bu muhim nuqtalarni doim yodda tutishimiz lozim.

Konferensiya ma’ruzalari mazmun jihatidan bir-birini to‘ldirdi:

– Musulmonlar inson jasadini sog‘lomlashtirishda eng avvalo uning ruhiyati va nafsini poklash, shuningdek, axloqini sayqallashga alohida e’tibor qaratganlar. Shu nuqtayi nazardan Tib ilmi ikki qism, ya’ni jism va qalb tabobatidan iborat bo‘lib, jism tabobati odamning badani a’zolarining salomat ekanligi jihatidan uning sog‘ligini saqlash yoki kasallikdan tuzatish uchun o‘rganiladi. Qalb tabobatida esa, inson yuragi holati uning tuzalishi yoki xasta bo‘lishi jihatidan o‘rganiladi. Qalb – inson jismidagi eng muhim a’zo. U sog‘lom bo‘lsa, boshqa a’zolar ham sog‘ bo‘ladi. Agar u buzuq bo‘lsa, boshqa a’zolar ham illatlanadi, deydi O‘zbekiston xalqaro islomshunoslik akademiyasi katta o‘qituvchisi (PhD) Lazizaxon Alijonova.

Jarayon sportning hayotimizdagi ahamiyati, Islom dinidagi o‘rnini ham nazariy, ham amaliy jihatdan namoyon qildi. Tadbir yakunida “Imom Moturidiy kubogi” sport musobaqalari doirasida bir qator kelishuvlar hamda O‘zbekiston xalqaro islomshunoslik akademiyasi, Oʻzbekiston Respublikasi Sport vazirligi, Oʻzbekiston Milliy olimpiya qo‘mitasi Oʻzbekiston Milliy paralimpiya qo‘mitasi o‘rtasida hamkorlik kelishuvlari imzolandi.